काठमाडौं (हाम्रो खेलकुद) – विभागीय नेपाल एपिएफ क्लब राजधानीमा जारी एक्सेल्सिया कलेज प्रधानमन्त्री कप एकदिवसीय राष्ट्रिय क्रिकेट प्रतियोगिताको फाइनलमा प्रवेश गरेका छन् ।

शनिबार भएको वर्षाले प्रभावित दोस्रो सेमिफाइनल खेलमा नेपाल पुलिसलाई ९ रनले पराजित गर्दै एपिएफले फाइनलमा आर्मीसँगको भेट पक्का गरेको हो । शुक्रबार भएको पहिलो सेमिफाइनलमा प्रदेश ५ लाई पराजित गर्दै आर्मी फाइनलमा पुगेको हो । एपिएफ र आर्मीबीचको फाइनल खेल आइतबार त्रिवि क्रिकेट मैदान कीर्तिपुरमा हुनेछ ।

त्रिवि क्रिकेट मैदान कीर्तिपुरमा एपिएफले दिएको २ सय ९ रनको लक्ष्य पछ्याइरहँदा १४ ओभर ३ बलको खेल जारी रहँदा वर्षा भएपछि खेल केहीबेर रोकिएको थियो । त्यतिबेला पुलिसले ५९ रन जोड्दा २ विकेट गुमाएको थियो । वर्षा रोकिएपछि खेल पुन सुचारु हुदा पुलिसले २८ ओभरमा १ सय ४१ रनको लक्ष्य पाएको थियो । त्यसपछि पुलिसले थप ७२ रन जोड्दा ९ विकेट गुमाएर १ सय ३१ रनमात्र बनाउन सकेपछि एपिएफले ९ रनको रोमाञ्चक जित हासिल निकाल्यो ।

मध्यम शुरुवात गरेको पुलिसको इनिङ्समा मध्यक्रममा ब्याट्सम्यान कुशल भुर्तेलले ३० रन बनाएपनि टिमलाई जिताउन सकेन । ओपनर सुनिल धमलाले २४ तथा दिलिप नाथले १६ रन बनाए । त्यस्तै दीपेन्द्रसिंह ऐरीले १४ रन जोड्दा कप्तान मञ्जित श्रेष्ठले ११ रनमात्रै बनाउन सक्यो । सिद्धान्त लोहनीले १० रन जोडे । अन्य ब्याट्सम्यानले दोहोरो अंकको रन छुन सकेनन् ।

एपिएफका अमरसिंह राउटेलाले ३ विकेट लिए । कप्तान बसन्त रेग्मीले २ तथा कमलसिंह ऐरी र करण केसीले समान १ विकेट लिए । राउटेला नै खेलको म्यान अफ द म्याच चुनिए । उनले १० हजार रुपैयाँ पुरस्कार पाए ।

यसअघि टस जितेर पहिले ब्याटिङ गरेको एपिएफले ४८ ओभर ५ बलमा अलआउट हुँदै २ सय ८ रनको मध्यम स्कोर खडा गरेको थियो । एपिएफका लागि अनिल शाहले सर्वाधिक ४५ रन बनाए । यस्तै पृथु बास्कोटाले ४० रन जोड्दा रोहित कुमार पौडेलले ३२ रनको योगदान दिए । प्रदीप ऐरीले २४, सुवास खकुरेलले २१ रन बनाए । पुलिसका दीपेन्द्रसिंह ऐरीले ३ र ललित राजबंशीले २ तथा ,आरिफ शेख र सुशील कंडेलले समान १ विकेट लिए ।

राष्ट्रिय खेलकुद परिषदको आयोजना तथा नेपालय इन्टरनेशनलको व्यवस्थापनमा भएको प्रतियोगिताको उपाधि विजेताले नगद २० लाख तथा उपविजेताले १० लाख रुपैयाँ पुरस्कार पाउनेछन् । प्रतियोगिताको सर्बोत्कृष्ट खेलाडीले १ लाख पुरस्कार पाउनेछन् भने उत्कृष्ट बलर र ब्याट्सम्यानले ५०–५० हजार पुरस्कार पाउनेछन् । प्रतियोगितामा ७ प्रदेश र ३ विभागीय क्लब गरी १० टिमको सहभागिता छ ।