काठमाडौं (हाम्रो खेलकुद)– विभागीय टोली नेपाल पुलिस क्लब र प्रदेश ५ राजाधानीमा जारी एक्सेल्सिया प्रधानमन्त्री कप एकदिवसीय राष्ट्रिय क्रिकेट प्रतियोगिताको सेमिफाइनलमा प्रवेश गरेको छन् । यि दुई टिम अन्तिम चारमा पुगेसँगै प्रतियोगिताको सेमिफाइनल समिकरण पुरा भएको छ । मंगलबार समूह ‘ए’ बाट त्रिभुवन आर्मी क्लब र नेपाल एपीएफ क्लबले सेमिफाइनलमा स्थान बनाएका थिए ।

राष्ट्रिय खेलकुद परिषदको आयोजना तथा नेपालय इन्टरनेशनलको व्यवस्थापनमा जारी प्रतियोगितामा तीन विभागीय टोलीहरु त्रिभुवन आर्मी, एपीएफ र नेपाल पुलिससहित प्रदेश नम्बर ५ ले सेमिफाइनलमा स्थान बनाए । त्रिवि क्रिकेट मैदान कीर्तिपुरमा बुधबार भएको खेलमा पुलिससँग हारेर पनि प्रदेश ५ समुह ‘बी’ को उपविजेता बन्दै अन्तिम चारमा पुग्न सफल भएको हो । पुलिसले प्रदेश ५ लाई ७ विकेटले हराएर समूह विजेता बन्यो ।

प्रदेश ५ ले दिएको २ सय १ रनको लक्ष्य पुलिसले ४४ ओभरमा ३ विकेट गुमाएर भेट्टायो । पुलिसको जितमा दीपेन्द्रसिंह ऐरीले अर्धशतकीय इनिङ्स खेले । सुस्त सुरुआत गरेको पुलिसका लागि दीपेन्द्र र आरिफ शेखले चौथो विकेटका लागि १ सय ४ रनको अविजित शतकीय साझेदारी गरेपछि सहज जित हासिल गरेको हो ।

दीपेन्द्रले ५३ बलमा ३ छक्का र २ चौकाको सहयोगमा ५८ रन बनाए । आरिफले ५१ बलमा ३ छक्का र २ चौकाको सहयोगमा अविजित ४५ रन जोडे । सुनिल धमलाले ३६ र अमित श्रेष्ठले ३० रन जोडे । दीलिप नाथले २४ रन बटुले । प्रदेश ५ का सन्दिप सुनारले २ तथा लाल अधिकारीले १ विकेट लिए ।

त्यसअघि पहिले ब्याटिङ गरेको प्रदेश नम्बर ५ ले निर्धारित ५० ओभरमा ८ विकेट गुमाउँदै २ सय रन बनाएको थियो । प्रदेश ५ का लागि शंकर रानाले ४४ रन बनाए । शौरभ खनालले ४२ रन जोड्दा कृष्ण कार्की २६ रनमा आउट भए । राजबीर सिंह २१ र सन्दीप सुनारले २० रनमा पभेलियन फर्किए । पुलिसका ललित राजबंशीले २ विकेट लिए । पुलिसका दिपेन्द्र खेलको म्याच अफ द म्याच चुनिए ।

शुक्रबार प्रतियोगिताको सेमिफाइल हुनेछ । सेमिफाइलमा समूह ‘ए’ को विजेता आर्मीले समूह ‘बी’ को उपविजेता प्रदेश नम्बर ५ सँग तथा समूह ‘ए’ को उपविजेता एपीएफले समूह ‘बी’को विजेता नेपाल पुलिससँग प्रतिस्पर्धा गर्नेछ ।