काठमाडौं (हाम्रो खेलकुद) – विभागीय टोली त्रिभुवन आर्मी क्लब एक्सेल्सिया प्रधानमन्त्री कप एकदिवसीय क्रिकेट प्रतियोगिताको समूह ‘ए’ को विजेता बन्दै सेमिफाइनलमा पवेश गरेको छ ।

कीर्तिपुरस्थित त्रिवि क्रिकेट मैदानमा भएको समूह चरणको अन्तिम खेलमा अर्काे विभागीय टोली नेपाल एपीएफ क्लबलाई ७० रनले पराजित गर्दै आर्मी समूह विजेताको रुपमा अन्तिम चारमा स्थान बनाउन सफल भएको हो । दुवै टोली एक खेल अगावै सेमिफाइनल पुगिसकेको कारण अन्तिम खेल समूह विजेता बन्नको लागि रहेको थियो ।

खेल वर्षाका कारण ४० ओभरमा झारिएको थियो । आर्मीले दिएको २ सय २९ रनको लक्ष्य पछ्याएको एपीएफ ३२ ओभर ५ बलमा सबै विकेट गुमाएर १ सय ५८ रनमै समेटियो । एपीएफका कुनै पनि ब्याट्सम्यानले ठुलो साझेदरी गर्न पाएनन् । एपीएफका लागि रोहित कुमार पौडेलले सर्वाधिक २८ रन बनाए । अनिल शाहले २५, सुवास खकुरेलले २२, भुवन कार्कीले २६ र अमरसिंह रौटेलाले अविजित २७ रन बनाए ।

एपीएफलाई सस्तैमा समेट्न आर्मीका सोमपाल कामीले ३ विकेट लिए । सुसन भारी, सागर पुन र साहव आलमले समान २ विकेट लिए ।
यसअघि टस हारेर पहिले ब्याटिङको निम्तो पाएको आर्मीले ओपनर अनिल मण्डल र कप्तान बिनोद भण्डारीको अर्धशतको मद्दतमा अन्तिम बलमा सबै विकेट गुमाउँदै २ सय २८ रन बनाएको थियो । आर्मीका लागि मण्डलले ९९ बल खेलेर ७ चौकाको सहयोगमा ७२ रनको इनिङ्स खेले ।

मण्डलले पहिलो विकेटका लागि सागर पुनसँग मिलेर ७७ तथा दोस्रो विकेटका लागि नरेश बुढाएरसँग मिलेर ८२ रनको साझेदारी गरेका थिए । सागरले ४६ तथा नरेशले ३७ रन बनाए । चौथो नम्बरमा ब्याटिङमा आएका कप्तान विनोद भण्डारीले फेरि एकपटक विष्फोटक पारी खेले । २२ वलमा अर्धशतक पूरा गर्दा भण्डारीले ७ छक्का प्रहार गरे । आर्मीका अन्य ब्याट्सम्यानले दोहोरो अंकको रन बनाउन सकेनन् । एपीएफका भुवन कार्कीले ३ विकेट लिए । करण केसी, कमलसिंह ऐरी, बसन्त रेग्मी र पृथु बास्कोटाले समान १ विकेट लिए । आर्मीका अनिल मण्डल खेलको म्यान अफ द म्याच चुनिए ।

मंगलबारै मुलपानी क्रिकेट मैदानमा भएको खेलमा प्रदेश ३ लाई ६ विकेटले पराजित गरेपछि नेपाल पुलिस क्लव सेमिफाइनल नजिक पुगेको छ । जितपछि पुलिसको ५ अंक भएको छ । प्रदेश ५ र ७ को पनि समान ५ अंक छ । बुधबार हुने प्रदेश ५ र पुलिसबीचको खेलले सेमिफाइनल मा पुग्ने दुई टिमको टुंगो लाग्नेछ । बुधबारको खेलमा पुलिस वा प्रदेश ५ ले ठूलो अन्तरको जित हासिल गरेको खण्डमा प्रदेश ७ को पनि सेमिफाइनल पुग्ने सम्भावना कायमै छ । प्रदेश ७ ले समूह चरणका चारै खेल खेलिसकेको छ ।

वर्षाका कारण २० ओभरमा छोट्याइएको खेलमा प्रदेश ३ ले दिएको १ सय ३८ रनको लक्ष्य पुलिसले १ बल बाँकी छँदा ४ विकेटको क्षतिमा भेट्टायो । पुलिसका लागि ओपनर सुनिल धमला र मध्यक्रमका ब्याट्सम्यान आरिफ शेखले उत्कृष्ट साझेदारी गर्दै टिमलाई जित दिलाए । यी दुईले चौथो विकेटका लागि १ सय १० रनको साझेदारी गरेपछि पुलिसले जित हासिल गरेको हो । आरिफले ६० रन बनाउँदा धमलाले ५० रनमा नटआउट रहे । प्रदेश ३ का रुपेश श्रीवास्तवले २ विकेट लिए ।

यसअघि टस जितेर पहिले ब्याटिङ गरेको प्रदेश ३ ले निर्धारित ओभरमा ९ विकेट गुमाएर १ सय ३७ रन बनायो । उसका लागि २ खेलाडीले मात्र दोहोरो अंकको रन बनाउन सके । अदिल खानले ४५ र सोनु तामाङले ४८ रन बनाउनुबाकेह अन्य खेलाडी क्रिजमा टिक्नै सकेनन् । पुलिसका रामनरेश गिरीले ३ तथा ललित भण्डारीले २ विकेट लिए । पुलिसका आरिफ खेलको म्यान अफ द म्याच चुनिए ।