काठमाडौं (हाम्रो खेलकुद) – त्रिभुवन आर्मी क्लबले राजधानीमा जारी एक्स्लेसिया प्रधानमन्त्री कप क्रिकेट प्रतियोगितामा प्रदेश १ लाई १ सय ६ रनले पराजित गरेको छ । बुधबार प्रतियोगिताको दोस्रो जित दर्ता गर्ने क्रममा आर्मीका लागि कप्तान विनोद भण्डारीले उत्कृष्ट ब्याटिङ गरे ।

आठौँ नम्बरमा ब्याटिङ गर्न आएका विनोदले २९ बलमा ४ चौका र ६ छक्काको मदतले ६४ रन जोडेका थिए । वर्षाका कारण ४५ ओभरमा छोट्याइएको खेलमा आर्मीले ९ विकेट गुमाउँदै २ सय २५ रन जोडेको थियो । खेलको झन्डै ६ ओभर बाँकी छँदा १५२-७ को अवस्थामा क्रिजमा एक विनोदले आक्रामक ब्याटिङ गरेका थिए । उनलाई विक्रम सोबले १३ बलमा १ चौका र १ छक्कासहित १६ रन प्रहार गरेर साथ दिए । म्यान अफ ड म्याच घोषित विनोदले इनिङ्सको अन्तिम ओभरमा २४ रन प्रहार गर्दै अन्तिम बलमा क्याच आउट भएका थिए ।

त्यसअघि आर्मीका लागि अनिल मण्डलले ३६ तथा नरेश बुढाएरले ३२ रन जोड्दै बलियो सुरुआत दिलाएका थिए । सुस्त गतिमा रन बटुलेपनि ओपनर सागर पुन (८) लाई सस्तैमा गुमाएको आर्मी त्यसपछि सम्हालिएको थियो । राजु रिजाल (४), भीम सार्की (१४) र राजेश पुलामी (२२) ले पनि सन्तोषजनक ब्याटिङ गर्न सकेनन् । सोमपाल कमीले १८ रन जोडे । प्रदेश १ का मनोज तामाङले ३ तथा मिन्हस थापा र फिर्दोश अन्सारीले २-२ विकेट लिए ।

जवाफमा प्रदेश १ का लागि कप्तान पुष्प थापा र राजन मगर बाहेक कसैले दोहोरो अंकमा स्कोर बनाउन सकेनन् । ३० औं ओभरमा १ सय १९ रन जोड्दै अलआउट भएको प्रदेश १ का ४ ब्याट्सम्यानले खाता खोल्न सकेनन् । कप्तान पुष्पले ७२ बलमा ६ चौका र १ छक्कासहित ५९ रन जोडे । रञ्जन मगरले ३० बलमा २४ रन बनाएका थिए । आर्मीका लागि सुसन भारीले ४ विकेट लिँदा साहब आलम, सगर पुन र सोमपाल कामीले २-२ विकेट लिए ।

तस्बिर: विवेक सुवेदी / हाम्रोखेलकुद