काठमाडौं (कास) – एभरेस्ट प्रिमियर लिग (ईपीएल) को अधिकारिक डिजिटल पार्टनरका रुपमा नेपालफ्लिक्स रहने भएको छ । बिहीबार ईपीएलको आयोजक ईपीएल प्राली र नेपालफ्लिक्सबीच सम्झौता भएको छ ।

सम्झौता अनुसार नेपालफ्लिक्सले यस सिजनको ईपीएलको विश्वभर आफ्नो डिजिटल एप्स र वेबसाइटको माध्यमबाट प्रत्यक्ष प्रसारण गर्नेछ । नेपालफ्लिक्सले दक्षिण एसिया लगायत विश्वभरका विभिन्न देशमा खेलकुद तथा मनोरन्जनात्मक कार्यक्रमको प्रत्यक्ष प्रसारण गर्दै आएको छ ।  बंगलादेशमा “बोङो” नामक एप्लिकेसनमार्फत आफ्नो छाप बसाएको कम्पनीले केहि समयमै नेपालफ्लिक्सको एन्ड्रोइड एप सार्वजनिक गर्ने बताएको छ । पाकिस्तान सुपर लिग र बाङ्लादेश प्रिमियर लिगको प्रत्यक्ष प्रसारण गर्दै आएको यस कम्पनिले पहिलोपटक नेपाली बजारमा हात हालेको हो ।

ईपीएलका प्रबन्ध निर्देशक आमीर अख्तरले यस सम्झौताले ईपीएललाई नेपालमात्र नभएर विश्वभर चिनाउन मदत पुग्ने बताए । उनले ईपीएलको सुरुआती दुई संस्करणले विश्वव्यापी चर्चा बटुलेका कारण नेपाली क्रिकेटलाई पनि फाइदा पुग्ने अभिव्यक्ति दिए । ईपीएलको तेस्रो संस्करण यसै नोभेम्बरमा सुरु गर्ने लक्ष्य आयोजकले राखेको छ । गतवर्षको विजेता विराटनगर वारीयर्ससँगै यसपटक पनि ६ टोलीले सहभागिता जनाउने छन् ।