काठमाडौं (हाम्रो खेलकुद) – विश्व क्रिकेटका स्टारहरु आज लर्ड्स मैदानमा विश्व ११ विरुद्ध वेष्ट इन्डिजको ‘च्यारिटी’ खेलमा उत्रिनेछन् । यस खेलमा उठेको पैसाद्वारा सन् २०१७ मा केरिबियन क्षेत्रमा आएको आँधीबाट प्रभावित रंगशालाको पुनर्निर्माण गरिने छ ।

सन् २०१७ मा आएका इर्मा र मारिया आधीँहरुले ५ रंगशालालाई पनि क्षति पुर्‍याएका थिए । यस खेलमा विश्व ११ को टोलीलाई पाकिस्तानी पूर्व कप्तान शाहिद अफ्रिदीले कप्तानी गर्नेछन् । इंग्ल्यान्डका कप्तान इयोन मोर्गनको कप्तानीमा टोली उत्रिने भनिए पनि उनी चोटिल भएपछि सो जिम्मेवारी अफ्रिदीले लिने भएका हुन् ।

अर्को तर्फ वेष्ट इन्डिनको टोलीको कप्तानी कार्लोस ब्रेथवेटले गर्नेछन् । विश्व ११ को टोलीमा बंग्लादेशका तमिम इक्बाल, भारतका दिनेश कार्तिक, पाकिस्तानकै शोएब मलिक, श्रीलंकाका थिसारा परेरा र न्युजील्यान्डबाट लुक रोन्की र मिसेल म्याक्लिनिघन जस्ता अनुभवी नामहरु छन् ।

नेपालका युवा स्पिनर सन्दीप लामिछाने पनि १३-सदस्यीय टोलीमा रहेका छन् तर उनले खेल सुरुवात गर्ने भन्ने पक्का भइसकेको छैन । सन्दीपले हालै आइपिएलमा राम्रो प्रदर्शन गर्दै विश्व क्रिकेटमा आफ्नो नाम चिनाउन सफल भएका हुन् । राम्रो लयमा रहेकाले उनले अवसर पाउने अपेक्षा गरिएको छ ।

वेष्ट इन्डिजको टोलीमा क्रिस गेल, दिनेस रामदिन, कार्लोस सामुयल्स, आन्द्रे रसल, सामुयल बद्रि र एभिन लुइसजस्ता ठूला नामहरु पनि रहेका छन् । खेल नेपाली समय अनुसार १०.४५ बजे सुरु हुने छ र सोनी सिक्स र सोनी सिक्स एचडीले प्रत्यक्ष प्रसारण गर्ने छ ।