काठमाडौं (हाम्रो खेलकुद) – त्रिभुवन आर्मी क्लबले एक्सेल्सिया प्रधानमन्त्री कप क्रिकेट प्रतियोगिताअन्तर्गत बिहीबार प्रदेश २ लाई ५५ रनले पराजित गरेको छ । टस जितेर ब्याटिङ रोजेको आर्मीले औसत प्रदर्शन गर्दै प्रदेश २ लाई २ सय ४५ रनको लक्ष्य दिएको थियो । सोमपाल कामीले आर्मीको लागि ४१ रन जोड्दै ३ विकेट लिए । 

इनिङ्सको तीन बल बाँकी रहँदा अलआउट भएको आर्मीका लागि राजु रिजालले सर्वाधिक ५० रन जोडे । उनले ८५ बलमा ५ चौका र १ छक्का प्रहार गरे । ओपनर सागर पुनलाई ८ रनमै गुमाएको आर्मीलाई अर्का ओपनर अनिल मण्डलले ३५ रन प्रहार गर्दै सम्हालेका थिए । कप्तान विनोद भण्डारीले १६ बलमा ४ चौका र १ छक्कासहित २३ रन जोड्दा नरेश बुढाएर दोस्रो बलमै खाता नखोली बोल्ड भए । मध्यक्रममा राजेश पुलामी मगरले ४० तथा सोमपाल कामीले ४१ रन बनाए । सोमपालले २८ बलमा २ चौका र १ छक्का प्रहार गरे । प्रदेश २ का दिभ्यान्शु मालिकले ३ तथा रशिद खान, सम्साद धेख र महबुब आलमले २-२ विकेट लिए ।

जवाफमा उत्कृष्ट सुरुआत पाएको प्रदेश २ ले मध्यक्रममा सम्हालिन नसक्दा ४० ओभरमा ९ विकेट गुमाउँदै  १ सय ८२ रन मात्र जोड्न सक्यो । दोस्रो इनिङ्समा दुई पटक वर्षा भएपछि प्रदेश २ ले ४० ओभरमा २ सय ३८ रनको लक्ष्य पाएको थियो । एक समय ७१-१ को स्थितिमा रहेको प्रदेश २ एक समय १०९-८ को स्थितिमा पुगेको थियो । शीर्षक्रममा ओपनर हरिशंकर साह ३४ र हसिम अन्सारीले २८ रन जोडे । रशिदले ३४ रन जोड्दा सुरज पटेल ४८ रनमा नटआउट रहे । उनले ४८ बल खेल्दै ६ चौका र २ छक्का प्रहार गरे ।

आर्मीका सोमपालले ३ तथा सुसन भारी, सगर पुन र साहब आलमले २-२ विकेट लिए । प्रतियोगितामा आर्मीको यो पहिलो खेलमै पहिलो जित हो । प्रदेश २ ले भने तेस्रो खेल सकिँदा एक जित मात्र हासिल गर्न सकेको छ ।