सुर्खेत (हाम्रो खेलकुद) – त्रिभुवन आर्मी क्लबले फाइनलमा रुपन्देही-११ लाई ३७ रनले पराजित गर्दै रुस्लान कर्णाली प्रिमियर लिगको उपाधि जितेको छ।

टस हारेर ब्याटिंग गरेको आर्मीले निर्धारित २० ओभरमा ७ विकेट गुमाएर १ सय ३२ रन बनाएको थियो। जवाफमा रुपन्देहीले १७.५ ओभरमा सबै विकेट गुमाउँदै ९५ रन मात्र बनायो। प्रतियोगिताको विजेता आर्मीले ३ लाख रुपैयाँ तथा उपविजेता रुपन्देही-११ ले १ लाख ५० हजार रुपैयाँ प्राप्त गर्यो ।

आर्मीका लागि ओपनर सागर पुनले सर्वाधिक ३८ रन बनाए भने बिनोद भण्डारीले २८ रन तथा राजेश पुलामी मगरले २२ रनको योगदान दिए । रुपन्देहीका बलर बिकाश श्रेष्ठले सर्वाधिक ३ विकेट हात पारे जुन क्रममा ४ ओभरमा २१ रन खर्चिए । यस्तै बसिर अहमद, बिक्रम भुसाल र सन्दिप सुनारले समान १/१ विकेट आफ्नो नाम गरे।

आर्मीका लागि विक्रम सोबले उत्कृष्ट बलिङ्ग गर्दै ३ विकेट लिए । विक्रम खेलको म्यान अफ द म्याच भए । त्यस्तै कृष्ण झा र सुशन भारिले समान २ विकेट हात पारे । रुपन्देहीको लागि निश्चल चौधरीले सर्वाधिक २६ रन, सन्दिप सुनारले २४ रन, शक्ति गौचनले १७ रन तथा सौरभ खनालले १६ रन योगदान दिए।

जेठ ३ गते देखि सुरु भएको प्रतियोगितामा १० टोलीको सहभागिता रहेको थियो।