काठमाडौं (हाम्रो खेलकुद)-  दिल्ली डेयरडेभिल्सबाट इन्डियन प्रिमियर लिग (आईपीएल) खेलेका सन्दीप लामिछाने अाज स्वेदश आइपुगेका छन् ।

सन्नेदीप  दिउँसो सवा चार बजे जेट एयरवेजको विमानबाट त्रिभुवन अन्तर्राष्ट्रिय विमानस्थल आइपुगेका थिए । उन लाई स्वागत गर्न विमानस्थल मा नेपाली क्रिकेट टोलीका कप्तान पारस खड्कालगायत समर्थकको उल्लेख्य  उपस्थिति थियो ।

सन्दीपले आईपीएल नेपाललाई चिनाउने मौका भएको भन्दै त्यसलाई सदुपयोग गर्न आफुले सक्दो प्रयास गरेको बताए । टोलीका पछिल्ला ३ खेलमा ५ विकेट लिएका  उनले भने, ‘सिक्ने अवसर थियो । त्यसलाई सदपुयोग गरेँ भन्ने लाग्छ ।अर्को वर्ष अन्य नेपाली खेलाडीलाई पनि आइपिएलमा हेर्ने इच्छा छ ।’

१७ वर्षीय लेग स्पिनर सन्दीप आइपिएल खेल्ने पहिलो नेपाली खेलाडी हुन् । उनी आइपिएलका लागि गत मार्च २७ मा भारत गएका थिए । उनलाई दिल्ली डेयरडेबिल्सले २० लाख भारुमा अनुबन्ध गरेको थियो । 

सन्दीपले आइपिएलमा उत्कृष्ट प्रदर्शन गर्दै ३ खेलबाट ५ विकेट लिन सफल भएका थिए । रोयल च्यालेन्जर्स बेंग्लोरविरुद्धको डेब्यु खेलमा प्रभावकारी प्रदर्शन गर्दै ४ ओभरमा मात्र २५ रन खर्चेर सन्दीपले १ विकेट लिएका थिए । त्यस्तै, चेन्नई सुपर किङ्सविरुद्धको खेलमा ४ ओभरमा २१ रन खर्चेर १ विकेट लिए । अन्तिम खेलमा साविक विजेता मुम्बई इन्डियन्सविरुद्ध सन्दीपले महत्वपुर्ण ३ विकेट लिन सफल भएका थिए । त्यसमा उनले ४ ओभरमा ३६ रन खर्चेका थिए ।