दिल्ली (एजेन्सी) – भिभो आइपिएल २०१८ अन्तर्गत नेपाली युवा स्पिनर सन्दीप लामिछाने सम्मिलित दिल्ली डेयरडेभिल्स अाज मुम्बई इन्डियन्ससँग आफ्नो अन्तिम खेल खेल्दै छ । फिरोज शाह कोट्ला स्टेडियममा खेलिने सो खेल नेपाली समयअनुसार ४.१५ बजे सुरु हुने छ ।

अघिल्लो दुई खेलमा उत्कृष्ट प्रदर्शन गरेका सन्दीप आज पनि सुरुवाती ११ मा परेका छन् । दिल्लीले आफ्नो अन्तिम खेलमा चेन्नाईलाई ३४ रनले हराएको थियो । सो खेलबाट दिल्लीले १ परिवर्तन मात्र गरेको छ । तुलनात्मक खराब बलिङ गरेका अभेस खानको स्थानमा इंग्ल्यान्डका बलर लियाम प्लन्केट टोलीमा फर्केका छन् ।

सन्दीपले आफ्नो दुई खेलमा विराट कोहली, एबी डि भिलियर्स, शेन वाट्सन, महेन्द्र सिंह धोनी र सुरेश रैनाजस्ता विश्व प्रसिद्ध ब्याट्सम्यानहरुलाई बलिङ गर्दै सबैलाई आफ्नो प्रदर्शनबाट प्रभावित गरेका छन् । दुई खेलमा कुल ८ ओभर बलिङ गर्दै उनले ४६ रन खर्चेर पार्थिव पटेल र रैनाको विकेट लिएका छन् । उनले कुल २० डट बल पनि फालेका छन् ।

दिल्ली तालिकाको अन्तिम स्थानमा रहेको छ भने मुम्बई पाँचौंमा रहेको छ । प्ले-अफमा पुग्नका लागि मुम्बईलाई आजको खेल जित्नै पर्ने हुन्छ । आज सन्दीपले रोहित शर्मा र केरन पोलार्डजस्ता विश्वकै प्रसिद्ध खेलाडीहरु बलिङलाई गर्न सक्ने छन् ।