हैदराबाद (एजेन्सी)– कोलकाता नाइट राइडर्स इन्डियन प्रिमियर लिग (आइपिएल) को प्ले अफका लागि छनोट भएको छ । शीर्षस्थानमा रहेको सनराइजर्स हैराबादलाई शनिबार ५ विकेटले हराउँदै कोलकता प्ले अफ पुग्ने तेस्रो टोली बनेको हो । सनराइजर्स र चेन्नई सुपर किङ्स यसअघि नै प्ले अफ पुगिसकेका छन् ।

प्ले अफ पुग्ने अब एउटा टोलीको टुंगो लाग्न बाँकी छ । हैदराबादको १८ अंक छ भने दोस्रो स्थानको चेन्नई र कोलकाताको समान १६ अंक छ ।१ सय ७३ रनको लक्ष्य पछ्याएको कोलकाताले २ बल बाँकी रहँदा ५ विकेट गुमाएर आवश्यक रन जोडेको थियो । ओपनर क्रिस लेनले अर्धशतक बनाएको खेलमा रोबिन उथप्पाले ४५ रन बनाएका थिए ।

४३ बल खेलेका लेनले ४ चौका र ३ छक्काका साथ ५५ रन जोडे । ३४ बल खेल्दै उथप्पाले ३ चौका र २ छक्का प्रहार गरे । अर्का ओपनर सुनिल नारिनले २९ रन र कप्तान दीनेश कार्तिकले अविजित २२ रन जोडे । हैदराबादका सन्दीप शर्माले २ र कार्लोसा ब्रथवाइटले समान २ र सकिब अल हसनले १ विकेट लिए ।

त्यसअघि टस जितेर ब्याटिङ गरेको हैदराबादले निर्धारित २० ओभरमा ९ विकेटको क्षतिमा १ सय ७२ रन बनाएको थियो । ओपनर शिखर धवनले अर्धशतक पुरा गरे भने श्रीवास्ताव गोस्वामीले ३५, काने विलियम्सनले ३६, मनीष पाण्डले २५ रन बनाए ।

३९ बल खेल्दै शिखरले ५ चौका १ छक्का प्रहार गरे । कोलकाताका प्रसिद्ध कृष्णले ४, आन्द्रे रसेल, सुनिल नारिन, कुलदीपक यादव र जाभोन सेरलिसले समान १ विकेट लिए ।