जयपुर (एजेन्सी)– विराट कोहलीको कप्तानीमा रहेको रोयल च्यालेन्जर्स बैंगलोर इन्डियन प्रिमियर लिग (आइपिएल) बाट बाहिरिएको छ । प्ले अफको सम्भावनालाई जीवित राख्न जित्नै पर्ने खेलमा राजस्थान रोयल्ससँग शनिबार ३० रनले पराजित भएसँगै बैंगलोर प्रतियोगिताबा बाहिरिएको हो । १४ खेलपछि बैंगलोरको १२ अंक छ ।

राजस्थान १४ अंकसहित चौथो स्थानमा उक्लेपनि अर्को खेलको नतिजा पछि मात्र प्ले अफ पुग्ने टोलीको टुंगो लाग्नेछ । १ सय ६५ रनको लक्ष्य पछ्याएको बैंगलोले १९.२ ओभरमा सबै विकेट गुमाएर १ सय ३४ रन मात्र बनाउन सक्यो ।

टोलीका एबी डि भिलियर्सले अर्धशतक बनाएको खेलमा पार्थिव पटेले ३३ तथा टिम साथी र मोहम्मद सिराजले समान १४ रन बनाए । बाँकी कुनै पनि ब्याट्सम्यानले दोहोरो अंकमा रन जोड्न सकेनन् । डी भिलियर्सले ३५ बलमा ५३ रन बनाएका थिए ।

राजस्थानका लागि श्रेयस गोपलले ५ विकेट लिए । जयदेब उनादकट र बेल लाउग्लिनले समान २ विकेट लिए । त्यसअघि टस जितेर पहिले ब्याटिङ गरेको राजस्थानले राहुल त्रिपाठीको अविजित अर्धशतकमा निर्धारित २० ओभरमा ५ विकेट गुमाएर १ सय ६४ रन बनाएको थियो ।

राजस्थानको तर्फबाट सर्वाधिक रन बनाएका ओपनर त्रीपाठीले ५० बलमा अविजित ८० रन प्रहार गरे । कप्तान अजिन्के रहानेले ३३ र हेनरिक क्लासेनले ३२ रन जोडे । रन आउट हुनुअघि कृष्णप्पा गोथमले १४ रन जोडे । बैंलोरका लागि उमेश यादवले ३ र मोहम्मद सिराजले १ विकेट लिए । राजस्थानका श्रेयस खेलको म्यान अफ दी म्याच घोषित भए ।