दिल्ली (एजेन्सी)– सनराइजर्स हैदराबाट इन्डियन प्रिमियर लिग (आइपिएल) को प्ले अफमा पुग्ने पहिलो टोली बनेको छ । शिखर धवन र कप्तान काने विलियम्सनले दोस्रो विकेटका लागि अविजित १ सय ७६ रनको साझेदारी गरेपनि हैदराबादले आइपिएलमा बिहिबार दिल्ली डेयरडेभिल्सलाई ९ विकेटले हराएको छ ।

यो जितसँगै हैदराबाद कम्तीमा चौथो स्थानमा रहने पक्का भएको छ । ११ खेलपछि हैदराबादको १८ अंक पुगेको छ । ११ खेलमा ८ हार पछि दिल्ली पुछारमा यथावत छ । १ सय ८८ रनको लक्ष्य पछ्याएको हैदराबादले १८.५ ओभरमा मात्र १ विकेट गुमाएर १ सय ९१ जित हासिल गरेको थियो ।

ओपनर शिखर धवनले ५० बलमा ९ चौका र ४ छक्काको मद्दतमा अविजित ९२ रन बनाएका थिए । कप्तान विलियम्सनले ५३ बलमा ८ चौका र २ छक्का प्रहार गरे । अर्का ओपनर एलेक्स हाल्सले १४ रन जोडेका थिए ।

त्यसअघि टस जितेर ब्याटिङ गरेको दिल्लीले रिशव पन्तको अविजित शतकसँगै ५ विकेटको क्षतिमा १ सय ८७ रन बनाएको थियो । रिशवको शतक भने छायाँमा परेको छ । रिशव एक्लैले अविजित १ सय २८ रन बनाएको खेलमा टोलीका लागि हर्सल पटेलले २४ र जासन रोयले ११ रन जोडे । ६३ बल खेलेका रिशवले १५ चौका र ७ छक्का प्रहार गरेका थिए ।

बाँकी कुनै पनि ब्याट्सम्यानले दोहोरो अंकमा रन बनाउन सकेनन् । आइपिएलमा दिल्ली डेयरडेभिल्सले ११ खेल खेल्दा पनि नेपाली बलर सन्दीप लामिछानेले मौका पाएका छैनन् । हैदराबादका सकिब अल हसनले २ र भूवनेश्वर कुमारले १ विकेट लिएका थिए । हैदराबादका शिखर खेलको म्यान अफ दी म्याच चुनिए । आइपिएलमा शुक्रबार राजस्थान रोयल्स र चेन्नई सुपर किङ्सबीच प्रतिस्पर्धा हुनेछ ।