काठमाडौं (हाम्रो खेलकुद)- राष्ट्रिय खेलकुद परिषद (राखेप) को आयोजनामा दोस्रो संस्करणको प्रधानमन्त्री कप एकदिवसीय राष्ट्रिय क्रिकेट प्रतियोगिता जेठ तेस्रो सातादेखि शुरु हुने भएको छ ।

राखेपले बिहिबार राजधानीमा पत्रकार सम्मेलनको आयोजना गर्दै एक दिवसीय राष्ट्रिय क्रिकेट प्रतियोगिता जेठ १३ गतेबाट २९ गतेसम्म हुने जानकारी गराएको हो ।

प्रतियोगितामा ७ प्रदेश र तीन विभागीय टोली गरी १० टिमको सहभागिता रहने राखेपका सदस्यसचिव केशव कुमार विष्टले पत्रकार सम्मेलनमा जानकारी दिए ।

सहभागी १० टिमलाई २ समूहमा विभाजन गरिएको छ । जस अनुसार समूह ‘ए’ मा त्रिभुवन आर्मी क्लब, नेपाल एपीएफ क्लब, र प्रदेश १, २ र ४ रहेका छन् । समूह ‘बी’ मा नेपाल पुलिस क्लब, प्रदेश नम्वर ३, ४ र प्रदेश नम्वर ६ रहेका छन् ।

लिग कम नकआउटका आधारमा हुने प्रतियोगिताको हरेक समूहका शीर्ष दुई टोली सेमिफाइनलमा प्रवेश राष्ट्रिय टोलीका मुख्य प्रशिक्षक जगत टमाटाले जानकारी गराए ।

यसवर्ष राखेपले प्राविधिक संयोजन, मैदान, दर्शक तथा खेलाडीको व्यवस्थापनको जिम्मा नेपालय इन्टरनेसनललाई दिएको छ । गतवर्षको संस्करण काठमाडौं क्रिकेट ट्रेनिङ सेन्टर (केसीटिसी)ले गरेपनि यसपटक केसीटिसीले प्रस्ताव नल्याएपछि प्राविधिक संयोजनको जिम्मेवारी नेपालयलाई दिएको सदस्यसचिव विष्टले जानकारी दिए । उनले नेपाल क्रिकेट संघ (क्यान) अस्तित्वमा आए प्रतियोगिताको जिम्मेवारी क्यानलाई दिन सकिने पनि बताए ।

प्रतियोगिताको विजेताले २० लाख नगदसहित ट्रफी प्राप्त गर्नेछ । उपविजेताले १० लाख रुपैया प्राप्त गर्नेछन् । प्रतियोगिताको म्यान अफ द सिरिजलाई एक लाख, उत्कृष्ट ब्याट्सम्यान र बलरलाई ५०–५० हजार प्राप्त गर्ने आयोजकले जनाएको छ ।

उदियमान खेलाडीलाई १५ हजार तथा हरेक खेलको म्यान अफ दि म्याचले १० हजार पाउनेछ । प्रतियोगिताको लागि १ करोड ८० लाख बजेट लाग्ने सदस्यसचिव विष्टले जानकारी गराए । ६५ लाख बजेट राखेपले छुट्याएको र बाँकी स्पोन्सर खोजेर र अझै अपुग भए अन्य बजेटबाट रकमान्तर गरिने सदस्यसचिव विष्टले बताए ।