मुम्बई (एजेन्सी)– मुम्बई इन्डियन्सले इन्डियन प्रिमियर लिग (आइपिएल) मा आइतबार कोलकाता नाइट राइजर्सलाई हराउँदै अंक तालिकाको पाँचौं स्थानमा उक्लेको छ । समान १० अंक भएका कोलकाता तेस्रो र किङ्स ११ पञ्जाब चौथो स्थानमा छ । समान १४ अंक भएका मध्ये सनराइजर्स हैदरावाद शीर्षस्थान र चेन्नई सुपर किङ्स दोस्रो स्थानमा छ ।

१ सय ८२ को लक्ष्य पछ्याएको कोलकाताले निर्धारित २० ओभरमा ६ विकेटको क्षेति १ सय ६८ रनमा रोकिएको थियो । टोलीका लागि रोबिन उथप्पाले अर्धशतक पुरा गरेका थिए भने कप्तान दिनेश कार्तिकले अविजित ३६ रन बटुलेका थिए । त्यस्तै नितेश राणाले ३१ र ओपनर क्रिस लेनले १७ रन जोडेपछि जितका लागि पर्याप्त भएन ।

उथप्पाले ३५ बलमा ६ चौका र ३ छक्का प्रहार गरे । कार्तिकले २६ बल खेल्दै ५ चौका र १ छक्का प्रहार गरे । मुम्बईका लागि हार्दिक पाण्डेयले २, मिचेल म्याक्लिघान, जसप्रित बुम्राह, कुर्नाल पाण्डेय र मयंक मार्कन्डेले समान १ विकेट लिए ।

त्यसअघि टस हारेर ब्याटिङको निम्तो पाएको मुम्बईले ओपनर सूर्यकुमार यादवको अर्धशतकसँगै ४ विकेटको क्षतिमा १ सय ८१ रन बनाएको थियो । सूर्यकुमारले ५९ रन बनाए । उनले ३९ बलमा ७ चौका र २ छक्का प्रहार गरे । अर्का ओपनर इभिन लेविसले २८ बलमा ५ चौका र २ छक्काका साथ ४३ रन जोडे ।

सूर्यकुमार र लेविसले पहिलो विकेटका लागि ९१ रनको साझेदारी गरेका थिए । हार्दिकले अविजित ३५ रन जोड्ने क्रममा २० बलमा ४ चौका र १ छक्का प्रहार गरे । कुर्नालले १४, जेपि डुमिनीले अविजित १३ र कप्तान रोहित शर्माले ११ रन बनाएका थिए । कोलकाताका सुनिल नारिन, आन्द्रे रसलले समान २ विकेट लिए । आइपिएलमा अहिले किङ्स ११ पञ्जाबविरुद्ध राजस्थान रोयल्सले ब्याटिङ गरिरहेको छ ।