बेंगलोर (एजेन्सी) – बलरहरुले सम्हालिएको प्रदर्शन गरेपछि इन्डियन प्रिमियर लिग (आईपीएल) अन्तर्गत मंगलबार रोयल च्यालेन्जर्स बेंगलोरले मुम्बई इन्डीयन्सलाई १४ रनले हराएको छ । जितका लागि १ सय ६८ रनको लक्ष्य पछ्याएको मुम्बईले २० ओभरमा ७ विकेट गुमाउँदै १ सय ५३ रनमात्र  जोड्न सक्यो । यस जितसँगै बेंगलोरले लिगमा तेस्रो जित हासिल गरेको छ ।

ओपनर इशान किशन पहिलो बलमै टिम साउथीको बलमा बोल्ड भएपछि मुम्बईले खराब सुरुआत लिएको थियो । चौथो ओभरमा उमेश यादवले पहिलो बलमा सूर्यकुमार यादव र त्यसपछि अर्को बलमा नयाँ ब्याट्सम्यान मुम्बईका कप्तान रोहित शर्मालाई शून्यमै पेभेलियन फर्काए । २१ रनमा शीर्ष ३ ब्याट्सम्यान गुमाएको मुम्बई खेलमा फर्कने प्रयास जारी राख्यो ।

काइरन पोलार्डले १३ बलमा १३ रन जोडे भने जेपी ड्युमिनीले २९ बलमा २३ रनको योगदान दिए । हार्दिक पान्ड्याले ४२ बलमा ५० रन जोड्दै जितको सम्भावना जीवित पारेपनि अन्य खेलाडीले राम्रो प्रदर्शन गर्न सकेनन् । क्रुनाल पान्ड्याले २३ रन र बेन कटीङले १२ रन जोडे । बेंगलोरका लागि पेस बलरहरु साउथी र यादवसँगै मोहमद सिराजले पनि २ विकेट लिए ।

त्यसअघि टस हारेपछि पहिलो ब्याटिङको निम्तो पाएको बेंगलोरले ७ विकेट गुमाउँदै १ सय ६७ रन जोडेको थियो । ओपनर क्विनटन डेककले १३ बलमा ७ रन जोड्दै खराब प्रदर्शन गरेपनि अर्का ओपनर मनन भोराले उत्कृष्ट ब्याटिङ गरे । उनले ३१ बलमा २ चौका र ४ छक्काको मदतले ४५ रनको योगदान दिए । तेस्रो नम्बरमा ब्याटिङ गर्न आएका ब्रेन्डन मक्कुलमले पनि २५ बलमा ३७ रन जोडे । उनले ४ चौका र २ छक्का प्रहर गरेका थिए ।

मध्यक्रममा कप्तान विराट कोहलीले ३२ रन जोड्दै बेंगलोरको इनिङ्सलाई सम्हाले । उनले २६ बलमा २ चौका र १ छक्का जोडे । मन्दिप सिंह १० बलमा १४ रन तथा वासिङ्टन सुन्दर र टिम साउथी १-१ रन जोड्दै पेभेलियन फर्कीए । बेंगलोरलाई ठुलो स्कोरसम्म पुर्याउन कोलिन डे ग्राण्डहोमले आक्रामक ब्याटिङ गरे । उनले १० बलमा ३ छक्काको मदतले नटआउट २३ रनको योगदान दिए । उनले मिचेल मक्लीनाघनको अन्तिम ओभरमा २४ रन निकालेका थिए ।

 

मुम्बईका लागि हार्दिक पान्ड्याले सर्वाधिक ३ विकेट लिए । जस्प्रित बुमराह, मायांक मार्कान्डे र मक्लीनाघनले पनि १-१ विकेट हात पारे । जोन पल ड्युमिनीले २ ओभरमा कुनै विकेट नलिई २८ रन खर्चेका थिए । मुम्बई र बेंगलोर दुवै टोलीले ७ खेलमा ४ अंक जोडेका छन् ।