पुेन (एजेन्सी)– चेन्नई सुपर किङ्सले इन्डियन प्रिमियर लिग (आइपिएल) मा सोमबार दिल्ली डेयर डेभिल्सलाई २ सय १२ रनको विजय लक्ष्य दिएको छ । शेन वाट्सनको अर्धशतक, अम्बाटी रायडु र कप्तान महेन्द्र सिंह धोनीको आक्रामक पारीपछि चेन्नई सुपर किङ्सले निर्धारित २० ओभरमा ४ विकेट गुमाएर २ सय ११ रन बनाएको थियो ।

टस हारेर पहिले ब्याटिङको निम्तो पाएको चेन्नईका लागि वाट्सन र फा डु प्लिसिसले पहिलो विकेटका लागि १ सय २ रन जोड्दै मजबुद सुरुवात दिलाएका थिए । वाट्सनले ४० बलमा ७ छक्का र ४ चौकाको मद्दतमा ७८ रन बनाएका थिए । डु प्लिसिसले ३३ बल खेल्दै ३ चौका र १ छक्कासहित ३३ रन जोडे ।

अघिल्लो खेलमा अर्धशतक बनाएका सुरेश रैना १ रनमै आउट भएपनि कप्तान धोनी र अम्बाटी रायडुले पारीलाई अघि बढाएका थिए । धोनीले अर्धशतक पुरा गरे भने रनआउट भएका रायडुले ४१ रन जोडे । २२ बल खेलेका धोनीले ५ छक्का र २ चौकाका साथ अविजित ५१ रन बटुले । २४ बलमा रायडुले ५ चौका र १ छक्का प्रहार गरे ।

नेपाली बलर सन्दीप लामिछाने आबद्ध दिल्लीका लागि अमित मिश्रा, विजय सरकार र ग्लेन म्याक्सवेलले समान १ विकेट लिए । सन्दीपले टोलीको आठौं खेलमा पनि मौका पाएनन् । यसअघिका ७ मध्ये ५ खेल जितेको चेन्नई १० अंकसहित दोस्रो स्थानमा छ । त्यत्तिनै खेलमा २ खेल मात्र जितेको दिल्ली ४ अंकसहित पुछारमा छ । १२ अंकसहित सनराइजर्स हैदराबाद शीर्षस्थानमा छ ।