कोहलपुर (हाम्रोखेलकुद)- पहिलो नेपालगन्ज कप क्रिकेट प्रतियोगिताको फाइनलमा दंगाली गोर्खाज र रोल्पा गोरिल्लाज भिड्दै छन् । कोहलपुर स्थित कोहलपुर क्रिकेट मैदानमा हुने खेल आज बिहान ११ बजे सुरुहुने आयोजकले जनाएको छ । प्रतियोगिताको बिजेता टोलीले ट्रफी तथा नगद १ लाख १० हजार रुपैयाँ र उपबिजेता हुने टोलीले नगद ६० हजार रुपैयाँ प्राप्त गर्ने छन् । 

६ टोली सम्मिलित प्रतियोगिताको समूह चरणको शिर्ष दुई टोली फाइनलमा भिड्न लागेका हुन् । दुवै टोलीले ५ मध्ये ४ खेलमा जित हात पारेका थिए। नेट रन रेटको आधारमा दंगाली गोर्खाज पहिलो र रोल्पाली गोरिल्लाज दोस्रो स्थानमा रहन सफल भए । समुह चरणमा यि टोली बीचको खेलमा गोर्खाज ६ विकेटले विजयी भएको थियो । 

गोरिल्लाजका कप्तान सौरभ खनाल फाइनलको दुवै टोली राम्रो रहेको र खेल प्रतिस्पर्धात्मक हुने बताउछन् । दंगाली विरुद्धको पहिलो खेलमा पराजय बेहोरेको सौरभले पहिलो खेलमा टोली नयाँ रहेको र खेलाडीहरुको भूमिका राम्रोसँग थाहा नहुँदा पराजय भोगेको र फाइनलमा केहि नयाँ हुने बताए । सौरभ भन्छन्,’ हाम्रो ब्याटिङ् र बलिङ् दुवै राम्रो हुँदै गैरहेको छ र हामीले प्रतियोगिता जित्ने ठुलो सम्भावना रहेको छ।’

दंगाली गोर्खाजका कप्तान सन्दिप सुनारले फाइनलमा मैदानमा गएर इन्जोय गर्दै राम्रो खेल्नेमा ढुक्क रहेको बताउँछन् । सन्दिपले टोलीमा स्थानीय र बाहिरका खेलाडीको राम्रो समन्वय रहेको  र ब्याटिङ् बलिङ् दुबैमा सन्तुलित रहेकोले आफ्नो टोली उपाधीको मुख्य दाबेदार रहेको बताए । उनले भने,’ हामीले पहिलो खेलमा नै गोरिल्लाजलाई पराजित गरिसकेको छौ र  हामी आज पनि राम्रो गर्नेमा ढुक्क छौ ।’