काठमाडौं (हाम्रो खेलकुद)– यसै साता सुरु हुने मनमोहन स्मृति अन्तर प्रदेश यु–१६ राष्ट्रिय क्रिकेट प्रतियोगिताको तयारी पूरा भएको आयोजकले जानकारी गराएको छ ।

आयोजक मनमोहन मेमोरियल क्रिकेट सेन्टरले मंगलबार राजधानीमा पत्रकार सम्मेलनको आयोजना गर्दै सातै प्रदेशको छनोट सम्पन्न भइसकेको सेन्टरका अध्यक्ष ठाकुर गैरे बताए । प्रतियोगिता कीर्तिपुर त्रिवि क्रिकेट मैदानमा बिहीबारदेखि सुरु हुँदैछ ।

सहभागी टिमलाई दुई समूहमा विभाजन गरी लिग कम नकआउट आधारमा खेल खेलाइने छ । खेल ३० ओभरको हुनेछ । प्रतियोगिताका सहभागी खेलाडीले सेतो रंगको जर्सी र ट्राउजर लगाउने र रातो बल खेलाइने बताइएको छ । प्रतियोगिताको समूह एमा प्रदेश नं २,४,५ र ७ तथा समूह बीमा प्रदेश नं १, ३ र ६ रहेका छन् ।

पहिलो प्रयासमा प्रदेशमा छनोट गराएर राष्ट्रिय प्रतियोगिता आयोजना गर्न लागिएको उल्लेख गर्दै सेन्टका अध्यक्ष गैरेले भने, ‘अर्को वर्षदेखि प्रदेशमा पनि अलग अलग छनोट प्रतियोगिता गराएर त्यहाँको च्याम्पियन टोलीलाई राष्ट्रिय प्रतियोगितामा सहभागी गराइनेछ । ‘

यस पटकको छनोटमा झन्डै १२ खेलाडीको उत्साहजनक सहभागिता रहेको उल्लेख गर्दै गैरेले त्यसले नेपालमा क्रिकेटको भविष्य राम्रो भएको संकेत गरेको बताए । ‘क्रिकेटमा लगानी गर्न हामी सरकारसँग पनि विशेष आग्रह गर्न चाहन्छौं,’ उनले भने, ‘सम्भव भयो भने यो खेलको विकासका लागि हामी एकेडेमी स्थापना गरेर अघि बढ्ने योजनामा छौं ।’

नेपाली राष्ट्रिय क्रिकेट टोलीका प्रशिक्षक जगत टमाटाले सानो उमेरको प्रतियोगिताले भविष्यमा राष्ट्रिय टोली निर्माणका लागि सहज हुने विश्वास व्यक्त गरे । यस्तो प्रतियोगिता अत्यन्तै आवश्यक छ । यस्तै उमेर समूहबाट भविष्यमा राष्ट्रिय टोली तयार हुने हो ।

प्रतियोगिताको विजेता टोलीले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । उद्घाटन खेल बिहबिार प्रदेश नं १ र ३ बीच हुनेछ ।