1. पुने (एजेन्सी)– शेन वाट्सनको शतकबाट प्रेरित चेन्नई सुपर किङ्सले इन्डियन प्रिमियर लिग (आइपिएल) मा शुक्रबार राजस्थान रोयल्सलाई ६४ रनले हराएको छ । जितसँगै चेन्नई शीर्षस्थानमा उक्लेको छ । समान ६ अंक भएपनि चेन्नई पहिलो, कोलकाता नाइट राइजर्स दोस्रो, सनराइजर्स हैदराबाद तेस्रो र किङ्स ११ पञ्जाब चौथो स्थानमा छ ।

२ सय ५ रनको लक्ष्य पछ्याएको राजस्थान १८.३ ओभरमा सबै विकेट गुमाएर १ सय ४० रन मात्र बनाउन सक्यो । बेन स्टोक्सले ४५ रन बनाएको राजस्थानका लागि जोन बट्लरले २२, अजिन्के राहने र जयदेवले समान १६ र स्टुआर्ट बिन्नीले १० रन बनाए ।

अन्य कुनै पनि ब्याट्सम्यानले दोहोरो अंकमा रन बनाउन सकेनन् । चेन्नईका दीपक चाहर, सर्दुल ठाकुर, ड्वान ब्राभो, कर्ण शर्माले समान २ तथा वाट्सन र इमरान ताहिरले समान १ विकेट लिए ।

त्यसअघि टस हारेर पहिले ब्याटिङको निम्तो पाएको चेन्नईले सेन वाट्सनको शतकसँगै निर्धारित २० ओभरमा ५ विकेट गुमाएर २ सय ४ रन बनाएको थियो । ओपनर वाट्सन ले ५७ बलमा ९ चौका र ६ छक्काको मद्दतमा १ सय ६ रन बनाएका थिए । सुरेश रैनाले २९ बलमा ९ चौकासहित ४६ रन जोडे ।

ब्राभोले अविजित २४ रन जोडे भने अम्बाटी रायडुले १२ रन थपे । राजस्थानका श्रेयस गोपालले ३ र बेन लङलिनले २ विकेट लिए । वाट्सन खेलको म्यान अफ दी म्याच घोषित भए । आइपिएलमा शनिबार २ खेल हुनेछन् । कोलकाता र पञ्जाबबीच पहिलो र रोयल च्यालेन्जर्स बैंगलोर र दिल्ली डेयर डेभिल्सबीच दोस्रो खेल हुनेछ ।