नेपालगन्ज (हाम्रो खेलकुद)– आशिर्वाद पेन्ट्स नेपालगन्ज टि ट्वान्टी क्रिकेट प्रतियोगितामा बिहिबिार अर्घाखाची सिमेन्ट्स बर्दिया टाइगर्स र पप्पु न्सट्रक्सन रोल्पा गोरिल्लाज विजयी भएका छन् । बर्दियाले आर्शिवाद पेन्ट्स पाल्पा योद्धाजलाई ८ रनले हरायो भने रोल्पाले जिसान बाँके ब्लास्टरमाथि ७९ रनको जित हासिल गरेको छ ।

पहिलो खेलमा टस हारेर ब्याटिङको निम्तो पाएको बर्दियाले निर्धारित २० ओभरमा ७ विकेट गुमाएर १ सय ४१ रन बनाएको थियो । टोलीका लागि सुवेन्दु पाण्डेले सर्वाधिक ३६ रन बनाए । ३६ बल खेलेका सुवेन्दुले ४ चौका र १ छक्का प्रहार गरे । विश्वास श्रेष्ठले अविजित २१ रन , आकाश बिष्टले १८ र नवीन ओलीले १७ रन बटुले । पाल्पा योद्धाजका विजय चौधरीले २, अमित तामाङ, भिम धमला र यस हमालले समान १ विकेट लिए ।

जवाफमा १ सय ४२ रन लक्ष्य पछ्याएको पाल्पाले ८ विकेटको क्षतिमा १ सय ३३ रन मात्र बनाउन सक्यो । अनुपम सिंहले अविजित ४४ रन तथा प्रनित थापाले ३९ रन बनाए । अनुपमले ३७ बलमा १ छक्का र ६ चौका प्रहार गरे । प्रनितले ३१ बलमा ५ चौका र १ प्रहार गरे । बर्दियाका राजवीर सिंह, अविनाश बोहारा र भरत थापाले समान २ विकेट लिए । बर्दियाका सुवेन्दु खेलको म्यान अफ दी म्याच घोषित भए ।

अर्को खेलमा टस जितेर ब्याटिङ गरेको रोल्पाले ३ विकेट गमाुएर १ सय ७२ रन बनाएको थियो । ओपनर सौरभ खनालले अर्ध पुरा गरे । ४५ बल खेलेका सौरभले ६ चौका र २ छक्का मद्दतले ५३ रन जोडे । सौरभले पहिलो विकेटका लागि आकाश थापासंग ९५ रनको साझेदारी गरे । भीम सार्कीले अविजित ४६ रन जोडे । १४ बलमा भीमले ६ चौका र ३ छक्क प्रहार गरे । सम्सुदीन अन्सारीले अविजित २३ रन जोडे । बाँकेका सोनु तामाङ र अख्तर हुसेनले समान १ विकेट लिए ।

१ सय ७२ रनको विजय लक्ष्य लिएर मैदानमा उत्रेको बाँकेले राम्रो सुरुआत गर्न सकेन । टोलीका अजय सहानीले २० रन,महेश क्षेत्रीले १७ रन र सोनुले १६ रन जोडे । रोल्पका विनोद लामाले ३, आकाश थापा र मेराज अन्सारीले समान २ विकेट लिए । रोल्पका सौरभ म्यान अफ दी म्याच घोषित भए । प्रतियोगितामा शुक्रबार दुई खेल हुनेछन् । पहिलो खेल अर्घाखाची र एनआइसी एसिया दंगाली गोर्खाज तथा पाल्पा र रोल्पाबीच प्रतिस्पर्धा हुनेछ ।