धनगढी (हाम्रो खेलकुद) – शुक्रबार हुने धनगढी प्रिमियर लिगको फाइनल खेलमा सोमपाल कामीको कप्तानीमा रहेको साबिक विजेता टिम चौराहा धनगढी र राष्ट्रिय टोलीका उपकप्तान समेत रहेका ज्ञानेन्द्र मल्ल कप्तान रहेका काठमाडौँ गोल्डेन्स भिड्दै छन्।खेल एसएसपि मैदानमा दिउँसो १२:३० मा  सुरु हुनेछ ।

पहिलो चरणको सबै खेल जितेर क्वालिफायरमा स्थान सुरक्षित बनाएको काठमाडौँ पहिलो क्वालिफायरमा चौराहासंगै पराजित भएपछि दोस्रो क्वालिफायर खेल्न बाध्य भएको थियो । बिहिबार भएको दोस्रो क्वालिफायर खेलमा महेन्द्रनगर युनाइटेडलाई विकेटले पराजित गर्दै फाइनलमा स्थान पक्का गरेको थियो । काठमाडौँका खेलाडीहरु सर्वाधिक रनकर्ता र विकेट लिनेको सुचिमा अग्रपंक्तिमामा  रहेका छन् ।

कप्तान ज्ञानेन्द्र मल्लले सर्वाधिक २ सय १८ रन प्रहार गरेका छन् भने राम्रो लयमा देखिएका ओपनर अमित श्रेष्ठ १ सय ८४ रन बनाउँदै सूचीमा तेस्रो स्थानमा छन् । काठमाडौँका भारतीय खेलाडी सन्नी पटेल १२ विकेट लिंदै सर्वाधिक विकेट लिने बलरको सूचीमा पहिलो स्थानमा छन् भने उदयीमान युवा बलर रसिद खानले ११ विकेट लिदै सूचीमा तेस्रो स्थानमा छन् ।

पहिलो चरणको अन्तिम खेलमा मात्र प्लेअफ पक्का गरेको चौरहाले क्वालिफायरमा काठमाडौँलाई १ विकेटले पाराजित गर्दै फाइनल पक्का गरेको हो । प्रतियोगितामा घरेलु टोली चौराहाका लागि ललित सिंह भण्डारीले सर्वाधिक ११ विकेट लिएका छन् भने युएईका कप्तान रोहन मुस्तफाले पनि उत्कृष्ट बलिङ् गर्दै ७ विकेट लिएका छन् । टोलीका लागि ब्याटिङ् तर्फ सुनिल धमलाले सर्वाधिक १ सय ५१ र मुस्ताफाले १३८ रनको योगदान गरेका छन् ।

यि दुई टोली यस प्रतियोगितामा यस अघि दुई पटक आमने सामने भैसकेका छन् । समुह चरणको खेलमा काठमाडौँ गोल्डेन्स ७ विकेटले विजयी भएको थियो भने पहिलो क्वालिफायरमा टिम चौराहा धनगढी १ विकेटले जित हासिल गरेको थियो ।