हैदरावाद (एजेन्सी)– सनराइजर्स हैदरावादले इन्डियन प्रिमियर लिग (आइपिएल) मा लगातार दोस्रो जित हासिल गरेको छ । बिहीबार भएको रोमाञ्चक खेलमा हैदरावादले मुम्बई इन्डियन्सलाई १ विकेटले पराजित गर्दै दोस्रो जित दर्ता गराएको हो । साविक विजेता मुम्बई भने लगातार दोस्रो खेलमा पराजित भएको छ । 

१ सय ४८ रनको लक्ष्य पछ्याएको हैदरावादले २० ओभरमा ९ विकेट गुमाएर १ सय ५१ रन जोड्दै आइपिएलमा लगातार दोस्रो जित हासिल गरेको हो । हैदरावाद ४ अंकसहित अंक तालिकाको शीर्षस्थानमा उक्लेको छ । ऋद्दीमान शाह र शिखवर धवनले पहिलो विकेटका लागि ६२ रनको साझेदारी गर्दै टोलीलाई दमदार सुरुआत दिलाएका थिए ।

तर त्यसपछिका ब्याट्म्यानले भने सन्तोषजक प्रदर्शन गर्न सकेन् । मध्यक्रमका दीपक हुडा र युसुफ पठानले इनिङ्स सम्हालेपछि हैदरावादले जितको आधार तयार पारेको थियो । ऋद्दीमानले २२ र शिखरले सर्वाधिक ४५ रनको योदान गरे । दीपकले अविजित ३२ बिल्ली स्टानलाकेले अविजित ५ रन बनाउँदा टोली विजयी भएको थियो ।

अन्तिम बलमा पुगेर हैदरावादले जित दर्ता गराएको थियो । दीपकले २५ बलमा १ चौका र १ छक्का प्रहार गरे । शिखरले २८ बल खेल्दै ८ चौका र ऋद्दीमानले २० बलमा ३ चौका प्रहार गरे । मुम्बईका मायंक मर्कान्डेले ४ ओभरमा २३ रन खर्चेर ४, मुस्ताफिजुर रहमाले ३, जसप्रित ब्रुम्ह्राले २ विकेट लिएका थिए । खेलको अन्त्यतिर मुम्बईका बलरहरुले उच्च प्रदर्शन गरेपनि जितका लागि भने पर्याप्त रहेन ।

त्यसअघि टस हारेर ब्याटिङको निम्तो पाएको मुम्बईले निर्धारित २० ओभरमा ८ विकेट गुमाएर १ सय ४७ रन जोडेको थियो । टोलीका लागि ओपनर इभिन लुइसले २९, सूर्यकुमार यादव र केरोन पोलार्डले समान २८, कुर्नाल पाण्डेयाले १५ र कप्तान रोहित शर्माले ११ रन बनाएका थिए ।

हैदरावादका सन्दीप शर्मा, बिली र सिद्धार्थ काउले समान २ विकेट लिए भने रसिद खान र सकिब अल हसनले समान १ विकेट लिए । हैदरावादका रसिद खेलका म्यान अफ दी म्याच घोषित भएका थिए । आइपिएलमा शुक्रबार रोयल च्यालेन्सर्ज बैंगलोर र किङ्स ११ पञ्जाबबीच प्रतिस्पर्धा हुनेछ ।