काठमाडौं (हाम्रो खेलकुद) – मनमोहन स्मृति अन्तर प्रदेश यू १६ राष्ट्रिय क्रिकेट प्रतियोगिता अर्को महिना आयोजना हुने भएको छ । पूर्व प्रधानमन्त्री मनमोहन अधिकारीको स्मृति दिवसको सन्दर्भ पारे मनमोहन मेमोरियल क्रिकेट सेन्टरले प्रतियोगिताको आयोजना गर्न लागेको हो ।

सेन्टरका अध्यक्ष ठाकुर गैरले प्रतियोगिता बैशाख १३ देखि १९ गते सम्म कीर्तिपुरस्थित अन्तर्राष्ट्रिय क्रिकेट मैदानमा सञ्चालन हुने जानकारी दिए । प्रतियोगितामा सात वटा प्रदेशको टोलीको सहभागिता रहनेछ । प्रतिस्पर्धा ३० ओभरको हुने बताइएको छ । प्रतियोगिताका लागि अर्को साता खेलाडी छनोट गरिने सेन्टरका अध्यक्ष गैरेले बताए ।

बैशाख ६ र ७ गते प्रदेश टोलीका लागि खेलाडी छनोट हुने बताइएको छ । प्रदेशअन्तर्गत १ नम्बरको को विराटनगर, २ को वीरगन्ज, ३ को काठमाडौं, ४ को पोखरा, ५ को भैरहवा, ६ को सुर्खेत र ७ को धनगढीमा छनोट हुने तय भएको छ । हरेक टोलीमा १४ खेलाडी छनोट हुनेछन् ।

सात दिन सम्म चल्ने प्रतियोगिताको विजेता टोलीले ५ लाख र दोस्रो हुने टोलीले २ लाख ५० हजार रुपैयाँका साथै खेल सामाग्री प्राप्त गर्नेछन् ।सेन्टरले प्रतियोगिताको समापनका दौरानमा २०७४ सालमा उत्कृष्ट प्रदर्शन गर्ने १–१ पुरुष/महिला क्रिकेट खेलाडी र १ जना प्रशिक्षकलाई ‘मनमोहन राष्ट्रिय क्रिकेट सम्मान– २०७४’ बाट सम्मान गर्ने अध्यक्ष गैरेले जानकारी दिए ।