धनगढी (हाम्रो खेलकुद)- धनगढ़ीमा जारी डिपिएल २ अन्तर्गतकाे दाेस्राे क्वालिफायरमा काठमाडाैं गाेल्डेन्स र महेन्द्रनगर युनाईटेडबीचकाे खेल चल्दै गर्दा बर्षात भएपछि बुधबार स्थगित भएको खेल आज दिउँसो १२:३० बजे सुरु हुनेछ । 

काठमाडाैंले टस जितेर पहिले फिल्डिङ गरेर २ अाेभरकाे खेल चलिरहँदा खेल वर्षाले स्थगित भएकाे थियाे । आजको खेलको बिजेता फाइनल प्रवेश गर्नेछ । बिजेताले उपाधिको लागि पहिलो क्वालिफायरको बिजेता चौराहासँग प्रतिस्पर्धा गर्नेछ ।

समूह चरणमा अपराजित रहदै क्वालिफायरमा प्रवेश गरेको काठमाडौँ उक्त खेलमा चौराहासँग १ विकेटले पराजित भएपछि फाइनल प्रवेशको लागि एलिमिनेटरको बिजेता महेन्द्रनगर युनाइटेडसँग भिड्ने भएको हो । प्रतियोगितामा काठमाडौँका लागि पछिल्लो दुई अन्तर्राष्ट्रिय प्रतियोगितामा लय गुमाएका कप्तान ज्ञानेन्द्र मल्ल लयमा फर्कदै प्रतियोगिताकै सर्वाधिक १९२ रन प्रहार गरेका छन् भने उदयीमान युवा फास्ट बलर रशिद खानले प्रतियोगिताकै सर्वाधिक ११ विकेट लिएका छन् ।

समुह चरणमा तेस्रो हुदै एलिमिनेटरमा सिवाइसी अत्तरियालाई १५ रनले पराजित गरेको महेन्द्रनगर युनाइटेडले फाइनल प्रवेशको लागि क्वालिफायरमा पराजित टोली काठमाडौँ गोल्डेन्ससँग खेल्ने पक्का भएको हो । महेन्द्रनगरका लागि प्रतियोगितामा भारतीय खेलाडी पुनित बिष्टले सर्वाधिक १२० रन प्रहार गरेका छन् भने ३ खेल खेलेका अभिनाश कर्णले सर्वाधिक ५ विकेट लिएका छन् ।