जयपुर (एजेन्सी)– वर्षाले प्रभावित इन्डियन प्रिमियर लिग (आइपिएल) को बुधबारको खेलमा राजस्थान रोयल विजयी भएको छ । डर्क वर्थ लुइस (डिएल) नियमका आधारमा राजस्थानले दिल्ली डेयर डेभिल्सलाई १० रनले हराएको छ ।

टस हारेर पहिले ब्याटिङको निम्तो पाएको राजस्थानले १७.५ ओभरमा ५ विकेट गुमाएर १ सय ५३ रन बनाएको थियो । राजस्थानले पुरा २० ओभर नखेल्दै वर्षा भएको थियो । वर्षा रोकिएपछि डिएलका आधारमा दिल्लीले ६ ओभरमा ७१ रनको लक्ष्य पाएको थियो ।

तर, दिल्लीले ६ ओभरमा ४ विकेट गुमाएर ६० रन मात्र बनाउन सक्यो । टोलीका लागि क्रिस मोरिसले अविजित १७ रन जाडे भने ओपनर ग्लेन म्याक्सवेलले पनि १७ रन बनाए । रिसव पन्तले २० रन थपे । राजस्थानका बेन लौगलिनले २ विकेट लिए ।

त्यसअघि राजस्थानका लागि कप्तान अजिन्के रहानेले ४५ रन बनाए भने सन्जु समसनले ३७ रन जोडे । त्यस्तै जोस बटलरले २९, बेन स्टोक्सले १६, राहुल त्रिपाठीले अविजित १५ रन बनाए । दिल्लीका लागि सहबाज नदिमले २ तथा ट्रेन बोल्ट र मोहम्मद सामीले समान १ विकेट लिएका थिए ।

नेपाली बलर सन्दीपले दिल्लीको दोस्रो खेलमा पनि मौका पाएनन् । दिल्ली लगातार दोस्रो खेलमा  पराजित हुँदा राजस्थानले दोस्रो खेलमा पहिलो जित दर्ता गराएको छ । आइपिएलमा बिहीबार सनराइजर्स हैदरवाद र मुम्बई इन्डियनबीच प्रतिस्पर्धा हुनेछ ।