धनगढ़ी (हाम्रो खेलकुद)- महेन्द्रनगर युनाइटेविरुद्ध मंगलबार भएको एलिमिनेटरमा पराजित हुँदै प्रतियोगिताबाट बाहिरिएपछि सिवाइसी अत्तरियाका कप्तान सुवास खकुरेलले विकेट अनुसारको लक्ष्य पाएपनि डट बल बढी खेल्दा जितबाट वञ्चित हुनुपरेको बताएका छन् ।

‘टार्गेट त्यति ठुलो थिएन । हामीले जहिले पनि ब्याटिङ राम्रो छ भनेर भन्यौ । तर, हरेक खेलमा हामी ब्याटिङमै फ्लप भयौं ।’ कप्तान खकुरेलले भने, ‘बीचमा थोरै अट्याक गर्न सकेको भए खेल आफ्नो पक्षमा पार्न सकिन्थ्यो । डट धेरै खायौ त्यो नै हाजको खेलमा हारको कारक बन्यो । विकेट पनि सजिलो थिएन । खेल्न गाह्रो पनि भएको थियो हामीले पनि गल्ती गर्यौ ।’ उनले मिडल अर्डरका ब्याट्सम्यानले कतिखेर डट बल र कतिखेर बाउन्ड्री हान्न त्यो सोच्न सक्नुपर्ने बताए ।

महेन्द्रनगरका कप्तान विनोद भण्डारीले यसअघि दुई खेल नहुदा पहिलाको लय कसरी समात्न सकिन्छ भन्नेमा गाह्रो भएपनि बलिङमा राम्रो प्रदर्शन गर्दा जित हात पार्न सकिएको बताए ।

महेन्द्रनगरका प्रशिक्षक विनोद दासले टिमको सोचे अनुसारको प्रदर्शन गर्न नभएपनि जित्न सकिएको बताए । ‘दुई स्किलमध्ये फिल्डिङ सोचेअनुसारको हुन सकेन । सँगसगै जसरी ब्याटिङको राम्रो शुरुवात भएको थियो । त्यो हुन सकेन ।’ प्रशिक्षक दासले भने, ‘पेपरमा हेर्दा हामी निकै बलियो टोली देखिएका छौं । तर, त्यो अनुसारको खेल्न सकेनौ । आगमी खेलमा त्यो प्रदर्शन देखाउने हाम्रो योजना हुनेछ ।’