हैदारावाद (एजेन्सी)– सनराइजर्स हैदरावादले ९ विकेटको सहज जितका साथ इन्डियन प्रिमियर लिग (आइपिएल) को सुरुवात गरेको छ । सोमबार राजस्थान रोयल्सले छाडेको १ सय २६ रनको लक्ष्यलाई हैदरावादले १५.५ ओभरमा मात्र १ विकेट गुमाएर १ सय २७ रन जोड्दै सहज जित हासिल गरेको थियो ।

दोस्रो विकेटका लागि शिखर धवन र काने विलिम्सनले १ सय २१ रनको साझेदारी गरेपछि आफ्नो पहिलो खेल जित्न हैदरावादलाई सहज रह्यो । ओपनर शिखर धवनले अर्धशतक पुरा गरे भने विलियम्सनले अविजित ३६ रन जोडे । ५७ बल खेलेका शिखरले १३ चौका र १ छक्काका साथ अविजित ७७ रन जोडे । विलियम्सनले ३५ बलमा ३ चौका र १ छक्का प्रहार गरे ।

त्यसअघि टस हारेर ब्याटिङ निम्तो पाएको राजस्थानले सञ्जु सिमसोनको सर्वाधिक ४९ रनको मद्दतमा निर्धारित २० ओभरमा ९ विकेट गुमाएर १ सय २५ रनको मध्यम स्कोर खडा गरेको थियो । हैदरावादका लागि सकिब अल हसन र सिद्धार्थ काउलले समान २ विकेट लिएका थिए ।

राजस्थानका लागि राहुल त्रिपाठीले १७, श्रेयस गोपालले १८ र ओपन अजिन्के रहाणेले १३ रन बनाएका थिए भने अन्य कुनै पनि ब्याट्सम्यानले दोहोरो अंकमा रन जोड्न सकेनन् । आइपिएलमा मंगलबार चेन्नई सुपर किङ्स र कोलकाता नाइट राइडर्सबीच प्रतिस्पर्धा हुनेछ । दुवैले आ आफ्नो पहिलो खेल जितेका थिए ।