धनगढी (हाम्रो खेलकुद) – सिवाइसी अत्तरिया रुस्लान डिपिएल –२ को प्ले अफमा पुग्ने चौथो टोली बनेको छ ।  आइतबार भएको लिगको अन्तिम खेलमा सिवाइसी अत्तरियाले विराटनगरलाई ६ विकेटले पराजित गर्दै प्ले अफमा पुग्ने चौथो टोली बनेको छ । यसअघि काठमाडौं गोल्डेन्स, महेन्द्रनगर युनाइटेड र टिम चौराहा धनगढीले प्ले अफमा स्थान बनाइसकेको थियो । अत्तरियाका लागि १३ बलमा २६ रन प्रहार गरेका विपिन चन्द्रा खेलको म्यान अफ द म्याच घोषित भए अत्तरियाका लागि १३ बलमा २६ रन प्रहार गरेका बिपिन चन्द्रा

विराटनगरले दिएको ५६ रनको लक्ष्य पछ्याएको अत्तरियाले ५ ओभर २ बलमा ४ विकेट गुमाएर लक्ष्य पूरा ग¥यो । अत्तरियाका दीपेन्द्रसिंह ऐरीले २० रन बनाए । विपीन चन्द्रा २६ रनमा नटआउट रहे । अत्तरियाले खेलको पहिलो ओभरमै ओपनरद्धय गौरव चितकारा र कुशल भुर्तेललाई गुमाएको थियो । चितकारा शुन्य रनमा आउट हुदा कुशल ४ रनमा आउट भए । त्यसपछि क्रिजमा आएका कप्तान दीपेन्द्र सिंह ऐरी र विपीनले टिमको तेस्रो विकेटको लागि ५१ रनको साझेदारी गर्दै जित नजिक पुर्याएका थिए ।

अन्तिम ओभरमा कप्तान पारस खड्काले २ विकेट लिदै टिमको आशा जगाएपनि त्यो पूरा हुन सकेन । विराटनगरका राम नरेश गिरीले पनि २ विकेट लिए ।  वर्षाले प्रभावित बनेको खेल ६ ओभरमा छोट्याइएपछि टस हारेर पहिले ब्याटिङको निम्तो पाएको विराटनगरले ३ विकेट गुमाएर ५५ रन बनायो ।

एसएसपी क्रिकेट मैदानमा आइतबार भएको खेलमा विराटनगका लागि ओपनर ब्याट्सम्यान अनिल कुमार शाह १५ रनमा आउट भए । अनिल कमल सिंह ऐरीको बलमा कुशल भुर्तेलबाट क्याच आउट भए । अर्का ओपनर ब्याट्सम्यान बाबार हायात १४ रनमा आउट भए । बाबार दोस्रो ओभरमा शुभांकर उराओको बलमा कुशल भुर्तेलबाट क्याच आउट भए ।

कप्तान पारस खड्का ९ रनमा आउट भए । दीलिप नाथ १५ रनमा नटआउट रहे । ९ बल खेलेका दीलिपनाथले १ छक्का र १ चौका प्रहार गरे । पवर्न सर्राफ रनमा क्रिजमा रहे ।  अत्तरियाका कमलसिंह ऐरीले २ तथा शुभांकर उराओले १ विकेट लिए ।