मुम्बई (एजेन्सी) – चेन्नई सुपर किङ्सले सनसनीपूर्ण जितका साथ इन्डियन प्रिमियर लिग (आइपिएल) को सुरुआत गरेको छ । शनिबार भएको उद्घाटन खेलमा महेन्द्र सिंह धोनीको कप्तानीमा रहेको चेन्नईले साविक बिजेता मुम्बई इन्डियन्सलाई १ विकेटले हराएको छ ।

खेलको नायक रहे ड्वायन ब्राभो । दबाबका बीच उनले अर्धशतक बनाउँदै चेन्नईको जितको आधार तयार पारेका थिए । १ सय ६६ रनको लक्ष्य पछ्याएको चेन्नईले निर्धारित २० ओभरमा १ बल बाँकी रहेको अवस्थामा ९ विकेटको क्षतिमा १ सय ६९ रन जोडेको थियो । एक समय ५१ रन बनाउँदा ४ विकेट गुमाइसकेको चेन्नईका लागि जित असम्भव जस्तै देखिएको थियो ।

तर ब्राभोले ३० बलमा ७ छक्का र ३ चौका प्रहाररका साथ ६८ रन जोडेपछि चेन्नई जिततर्फ अघि बढेको थियो । टोलीका केदार जादबले अविजित २४, अम्बाती रायडुले २२ तथा सेन वाट्सनले १६ रन जोडे । रविन्द्र जडेजाले १२ रन बनाउँदा धोनी र सुरेश रैनाले समान ४ ताथ हरभजन सिंहले ८ रन बनाए । इमरान ताहिर २ रनमा अविजित रहे । मुम्बईका मायांक मार्कन्डे र हार्दिक पाण्डयले समान ३ विकेट लिए ।

त्ययसअघि टस हारेर पहिले ब्याटिङ गरेको मुम्बईले ४ विकेटको क्षतिमा १ सय ६५ रन जोडेको थियो । सामूहिक प्रदर्शन गर्ने क्रममा टोलीका लागि सूर्य कुमार यादवले ४३, कुर्नाल पाण्डयले अविजित ४१ , इशान खानले ४०, हार्दिक पाण्डयले अविजित २२ तथा कप्तान रोहित शर्माले १५ रन बनाएका थिए । चेन्नईका लागि शेन वाट्सनले २ विकेट लिए ।

आठ टोलीको सहभागिता रहेको आइपिएलको दोस्रो दिनआइतबार दुई खेल हुनेछन् । किङ्स ११ पञ्जाब र दिल्ली डेयर डेभिल्सबीच मोहालीमा तथा कोलकाता नाइट राइडर्स र रोयल च्यालेन्जर्स बैंगलोरबीच कोलकातामा प्रतिस्पर्धा हुनेछ । दिल्लीमा आबद्ध नेपाली बलर सन्दीप लामिछानेले आज खेल्ने अपेक्षा गरिएको छ ।