धनगढी (हाम्रो खेलकुद)– धनगढीमा जारी रुस्लान डिपिएल–२ अन्तर्गतको महेन्द्रनगर युनाइटेड र सिवाइसी अत्तरियाबीचको पहिलो खेल वर्षाले प्रभावित भएको छ । शुक्रबार राति परेको हावाहुरीसहितको वर्षाका कारण महेन्द्रनगर युनाइटेड र सिवाइसी अत्तरियाबीचको खेल प्रभावित भएको हो ।

शुक्रबार राति परेको वर्षाका मैदानमा पानी जमेका कारण निर्धारित समयमा खेल हुन नसकेको हो । दुवै टिमका खेलाडी र अफिसियल्स मैदानमा पुगिसकेका छन् । मैदानमा बिहानैदेखि पानी सुकाउने काम जारी छ । यधपी खेल हुने सम्भवना भने निकै न्युन रहेको छ।

मैदान तयार नभए दुवै टोलीले १–१ अंक बाड्नेछ । खेल हुन नसके महेन्द्रनगर युनाइटेड प्ले अफमा प्रवेश गर्नेछ भने, सिवाइसी अत्तरियालाई प्ले अफ पुग्न आइतबार हुने विराटनगरविरुद्धको खेल जित्नैपर्ने हुन्छ । लिग चरणमा महेन्द्रनगर ३ खेलबाट ४ अंकसहित दोस्रो स्थानमा छ । अत्तरियाको ३ खेलबाट २ अंक जोडेर पाँचौ स्थानमा छ ।

धनगढी टिम चौराहा र विराटनगर किङ्सपनि प्ले अफ नजिक छ । टिम चौराहा धनगढी र प्रतियोगिताबाट बाहिरिसकेको रुपन्देहीबीचको दोस्रो खेलका लागि मैदान तयार भइसक्ने आयोजकले जनाएको छ । यस खेलमा जित हात पारेमा चौराहा प्लेअफमा पुग्नेछ भने पराजित भएमा अन्य टोलीको नतिजा कुर्नुपर्नेछ ।