काठमाडौं (हाम्रो खेलकुद)– नेपाली क्रिकेट टोलीका स्पिनर सन्दीप लामिछाने वा इन्डियन प्रिमियर लिग (आइपिएल) टोली दिल्ली डेयर डेभिल्सका समर्थकले अब राजधानीमै दिल्लीको जर्सी किन्न पाउने भएका छन् । आइपिएल सुरु हुन एक दिन मात्र बाँकी रहँदा स्पोर्टस् युनिभर्सले दिल्ली डेयर डेभिल्सको जर्सी विक्रीका लागि ल्याएको छ ।

‘क्रिकेट र त्यसमा पनि सन्दीपका फ्यानहरुको माग बढेपछि हामीले जर्सी ल्याउने निर्णय गरेको हौं,’ स्पोर्टस् युनिभर्सका प्रबन्ध निर्देशक दीपक विष्टले भने, ‘क्रिकेट अहिले पछिल्लो समयमा निकै लोकप्रिय भइरहेको छ , त्यसमा सन्दीप दिल्लीमा आबद्ध भएपछि यसअघि क्रिकेटमा चासो नराख्नेले पनि राख्न थालेका छन् । यो नेपाली खेलकुदका लागि सुखद पक्ष हो । ‘

आइपिएल नेपाली क्रिकेट समर्थकले पनि निकै पछ्याइरहेको पाइन्छ । सन्दीपकै कारण नेपालीले यसपटकको सिजन झनै बढी आइपिएल पछ्याउने सम्भावना छ । सन्दीप अहिले टोलीसँगै अभ्यास गरिरहेका छन् ।

टोलीका कप्तान रिकी पोन्टिङ जुन सुकै खेलाडीले मौका पाउन सक्ने बताएपछि सन्दीपले पनि खेल्न पाउने आशा गरिएको छ । दिल्लीले आइतबार पहिलो खेल खेल्दैछ ।

सन्दीपसँगको सम्झौताका लागि दिल्ली डेयर डेभिल्सका सिइओ नेपाल आउँदा स्पोर्टस् युनिभर्सका भेट गरेपछि टोलीको जर्सी स्पोर्टस युनिभर्सले बेच्ने सहमति बनेको ओलम्पियन समेत रहेका विष्टले बताएका छन् । बानेश्वर रहेका स्पोर्टस् युनिभर्समा अधिकांश खेलका खेल सामाग्री पाइने बताइएको छ ।