अमृत चिमरिया
हेटौंडा – क्रिकेट मैदान निर्माणका लागि भन्दै विभिन्न जिल्लाको यात्रामा निस्केका धुर्मस सुन्तली फाउन्डेसनका सिताराम कट्टेल (धुर्मुस) बुधबार मकवानपुर पुगेका छन् ।

मकवानपुरको हेटौंडा उपमहानगरपालिका वडा नंबर ६ मा रहेको प्रस्तावित केन्द्रीय खेलकुद प्रतिष्ठानमा क्रिकेट मैदान अवलोकनका लागि कट्टेल प्रदेश नं ३ का मुख्यमन्त्री डोरमणी पौडेलको साथमा त्यहाँमा पुगेका थिए ।

मुख्यमन्त्री पौडेलले क्रिकेट मैदान लागि निकै चासो व्यक्त गरेको अवस्थामा धुर्मुससहितको टोलीलाई प्रतिष्ठान क्षेत्रमा अवलोकन गरेका हुन् । अवलोकनपछि मूख्यमन्त्री पौडेलले रंगशालालाई खेलकुद पर्यटकीय क्षेत्रको रुपमा विकास गर्ने अभियानमा लागेको उल्लेख गर्दै धुर्मुस टोलीले बनाउन लागेको क्रिकेट मैदानका लागि जग्गा उपलव्ध गराउन तयार रहेको बताए ।

२३ विगाह क्षेत्रफलमा फैलिएको प्रतिष्ठानको रुपमा विकास गरी सबै खाले विधाका खेलका प्रतियोगिता र अभ्यास संचालन गर्ने लक्ष्य सरकारले निर्माण कार्य अघि बढाएको छ । प्रतिष्ठानमा क्रिकेट मैदान पनि प्रस्तावित रहेकोले धुर्मुस सुन्तली फाउन्डेसन जग्गा उपलव्ध कुनै कठिनाई नहुने जिल्ला खेलकुद विकास समितिले जनाएको छ ।

कट्टेले भौगोलिक हिसावले मैदानका लागि जग्गा उपयुक्त रहेको भन्दै आईसिसीको मापदण्ड अनुसार प्राविधिक दृष्टिकोणले उपयुक्त देखिए काम अघि बढाउने बताए । अनुगमनमा धुर्मुस, कुमार कट्टेल (जग्री) , हास्य कलाकार मनोज गजुरेल सहितको टोली रहेको थियो ।