धनगढी (हाम्रो खेलकुद) – सर्वाधिक पुरस्कार राशिको रुस्लान धनगढी प्रिमियर लिग (डिपिएल)–२ मा मंगलबारको पहिलो खेलमा महेन्द्रनगर युनाइटेडले टिम चौराहा धनगढीलाई १ सय ३२ रनको विजयी लक्ष्य दिएको छ ।

अञ्चल प्रहरी कार्यालयको खेल मैदानमा टस हारेर ब्याटिङको निम्तो पाएको महेन्द्रनगरले निर्धारित २० ओभरमा ८ विकेट गुमाएर १ सय ३१ रनको मध्यम योगफल तयार पारेको थियो । खराव सुरुवात गरेको महेन्द्रनगरका लागि मध्यक्रमका ब्याट्सम्यानले टिमको इनिङ्स उकासेका थिए ।

पुनित मेहरा ४० रनमा आउट भए । २२ बल खेलेका पुनितले ४ चौका र २ छक्का प्रहार गरेका थिए । भुवन कार्की ३२ रनमा आउट रहँदा पुनित विष्टले २४ रन बनाए । ओपनर विनोद भण्डारी ११ रनमा आउट हुदा अर्को ओपनर आसिफ शेख ८ रनमा ललितसिंह भण्डारीको बलमा बोल्ड आउट भए । रोहित कुमार पौडेल ३ रनमा आउट हुदा हरिशंकर शाह र आरिफ शेखले खाता नै खोल्न सकेनन् ।

धनगढीका ललितसिंह भण्डारीले ४ विकेट लिए । कप्तान सोमपाल कामी र सामसद शेखले समान १ विकेट हात पारे । दुवै टोली दोस्रो जितको खोजीमा हुनेछन् । धनगढी पहिलो खेलमा काठमाडौं गोल्डेन्ससँग ७ विकेटले पराजित भएको थियो भने । दोस्रो खेलमा सिवाइसी अत्तरियामाथि ३ विकेटको जित निकालेको थियो । महेन्द्रनगरले विराटनगरमाथि ३३ रनको जित निकालेको थियो ।