धनगढी (हाम्रो खेलकुद)– काठमाडौं गोल्डेन्सले रुस्लान धनगढी प्रिमियर लिग (डिपिएल) २ मा लगातार दोस्रो जित हासिल गरेको छ । काठमाडौंले सोमबारको दोस्रो खेलमा रुपन्देही च्यालेन्जर्स ६३ रनले हराएको छ ।

रुपन्देहीको लगातार यो दोस्रो हार हो । टोली आइतबार सिवाईसी अत्तरियासँग ९ विकेटले पराजित भएको थियो । काठमाडौंले पहिलो खेलमा धनगढी टिम चौराहामाथि जित दर्ता गरेको थियो ।

एएसपी क्रिकेट मैदानमा १ सय ८७ रनको लक्ष्य पछ्याएको रुपन्देहीले १८.४ ओभरको सबै विकेट गुमाएर १ सय २३ रन मात्र बनाउन सकेको थियो । रुपन्देहीलाई लक्ष्यमा पुग्न दिनबाट काठमाडौंका रसिद खानले ४ विकेट लिएका थिए । २.४ ओभर बलिङ गरेका उनले मात्र ६ रन खर्चेका थिए ।

त्यस्तै ललितनारायण राजवंशीले ३, सहाब आलमले २ तथा सन्नी पटेलले १ विकेट लिएका थिए । रुपन्देहीका लागि ओपनर प्रदीप ऐरीले अर्धशतक पुरा गरेका थिए । सागर पुनले १८, दीपक प्रसादले १० रन जोडे भने अन्य कुनै पनि खेलाडीले दोहोरो अंकमा रन बनाउन सकेनन् । प्रदीपले ४१ बल खेल्दै ५ छक्का र त्यत्तिनै चोकामा ५७ रन बनाएका थिए ।

त्यसअघि टस जितेर ब्याटिङ गरेको काठमाडौंले सामूहिक प्रदर्शन गर्दै निर्धारित २० ओभरमा ४ विकेट गुमाएर १ सय ८६ रन बनाएको थियो । टोलीका लागि सन्नीले सर्वाधिक अविजित ४८ रन बनाएका थिए । त्यस्तै नरेश बुढाएरले अविजित ३० रन जोडेपछि टोलीले ठूलो स्कोर खडा गरेको थियो ।

१९ बल खेलेका सन्नीले ५ चौका र ३ छक्का प्रहार गरे । नरेशले १८ बलमा २ छक्का र त्यत्तिनै चौका प्रहार गरे । ओपनर अमित श्रेष्ले ३० र अर्को ओपनर सुवोध भाटीले ४२ रन जोडे । २७ बल खेलेका अमितले २ छक्का र १ चौका प्रहार गरे । सुवोधले २५ बल खेल्दै ४ छक्का र ३ चौका प्रहार गरे ।

ज्ञानेन्द्र मल्लले रनआउट हुनुअघि २० र भूपेन्द्र थापाले १४ रन जोडे । रुपन्देहीका अमर राउटेला, विक्रम भुसाल र सुफायन महमुदले समान १ विकेट लिए । काठमाडौंका सन्नी खेलको म्यान अफ दी म्याच भए र उनले १० हजार रुपैयाँ प्राप्त गरे ।