धनगढी (हाम्रो खेलकुद) – सोमपाल कामीले अन्तिमतिर विस्फोटक ब्याटिङ गरेपछि टिम चौराह धनगढीले सोमबार सिवाइसी अत्तरियालाई ३ विकेटले पराजित गरेको छ । १ सय ५१ रनको लक्ष्य पछ्याएको धनगढीले ७ विकेट गुमाएर ४ बलअघि आवश्यक रन बटुलेको थियो ।

दोस्रो खेलमा साविक विजेता धनगढीको यो पहिलो जित हो । पहिलो खेलमा धनगढी काठमाडौं गोल्डेन्ससँग पराजित भएको थियो । अत्तरियाविरुद्ध सोमपालले १५ बलमा ३९ रनको इनिङ खेल्दै टोलीलाई जित दिलाएका थिए ।

सो क्रममा उनले ३ चौका र ३ छक्का प्रहार गरेका थिए । त्यस्तै धनगढीको जितमा रोहन मुस्तफाले ४० रन जोडे । खेलको म्यान अफ द म्याच सोमपालले १० हजार नगद पाए।अत्तरियाका दीपेन्द्र सिंह ऐरी र शुभांकर उरावले समान २ विकेट लिए । विनोद लामा लर विपिन चन्द्राले समान १ विकेट लिए ।

त्यसअघि टस हारेर ब्याटिङमा उत्रेको अत्तरियाले निर्धारित ओभरमा ८ विकेट गुमाएर १ सय ५० रन बनाएको थियो । अत्तरियाका लागि विपिन चन्द्रा र प्रेम तामाङले सर्वाधक समान २८ रन जोडे। यस्तै, कुशल भुर्तेलले २५ र दीपेन्द्रसिंह ऐरीले १९ रन बनाए । उनीहरुसँगै कृष्ण कार्कीले १४, गौरव चितकारा र सुवास खकुरेलले समान १३ रन बटुले ।

धनगढीका ललितसिंह भण्डारीले सर्वा्धिक ३ विकेट लिए। ४ ओभरको स्पेलमा उनले २४ रन खर्चे । विदेशी खेलाडी तथा यूएईका कप्तान रोहन मुस्तफाले २ विकेट लिए । ४ ओभर बलिङ गरेका उनले १ ओभर मेडन राख्दै ३५ रन खर्चेका थिए। यस्तै, सामसद शेख र सोमपाल कामीले समान १ विकेट लिए ।