धनगढी (हाम्रो खेलकुद)– राष्ट्रिय टोलीका कप्तान पारस खड्काको नेतृत्वमा रहेको विराटनगर किङ्सले हारबाट रुस्लान धनगढी प्रिमियर लिग (डिपिएल) २ को यात्रा सुरु गरेको छ । एएफसी मैदानमा आइतबार भएको दोस्रो खेलमा विराटनगर विनोद भण्डारीको कप्तानमा रहेको महेन्द्रनगर युनाइटेडसँग ३३ रनले पराजित भएको छ ।

१ सय ६९ रनको लक्ष्य पछ्याएको विराटनगर १९ ओभरमा सबै विकेट गुमाएर १ सय ३५ रन मात्र बनाउन सक्यो । अभिनाष कर्ण, पुनित मेहरा, भुवन कार्की र रोविन क्षत्रीले विराटनगरलाई लक्ष्यमा पुग्नबाट रोकेका थिए । अभिनाषले ३ विकेटले लिए भने पुनित, भुवन र रोविनले समान २ विकेट लिएका थिए ।

विराटनगरका लागि शीर्षस्थानका ब्याट्सम्यानले मध्यम खालको प्रदर्शन गरेपनि तल्लो क्रमका ब्याट्सम्यानले त्यसलाई निरन्तरता दिन सकेनन् । सात नम्बरमा ब्याटिङ गरेका पारसले पनि १६ रन मात्र बनाउन सके । टोलीका लागि पृथु बास्कोटाले सर्वाधिक ३५, बाबर हायतले ३२, अनिल शाहले २३ र दीलिप नाथले १० रन जोडे । बाँकी ब्याट्म्यानले दोहोरो अंकमा रन बनाउन सकेनन् ।

त्यसअघि टस जितेर ब्याटिङ गरेको महेन्द्र नगरले २० ओभरमा ५ विकेट गुमाएर १ सय ६८ रन बननएको थियो । टोलीका लागि पुनितले सर्वाधिक अविजित ३८ रन जोडे । १८ बलमा २ चौका र ३ छक्का प्रहार गरे । ओपनर विनोदले २९ बलमा ५ चौका र १ छक्कासहित ३५ रन बटुले ।

पुनित विष्टले २४, आरिफ शेखले २०, हरि शंकर शाहले १९ रन थपे । विराटनगरका मन्जित श्रेष्ठले २, पारस र शुभम कामले समान १ विकेट लिए । २ विकेट र अविजित ३८ रन बनाएका महेन्द्रका पुनित खेलको म्यान अफ दी म्याच घोषित भए ।