धनगढी (हाम्रो खेलकुद)– सिवाइसी अत्तरियाले रुस्लान धनगढी प्रिमियर लिग (डिपिएल) २ मा विजयी सुरुआत गरेको छ । रुपन्देही च्यालेन्जर्सलाई आइतबार ९ विकेटको सहज जित हात पार्दै अत्तरियाले सुखद सुरुआत गरेको हो ।

एसएसपी मैदानमा ६२ रनको झिनो लक्ष्य पछ्याएको अत्तरियाले ७.३ ओभरमा १ विकेटको क्षतिमा ६५ रन जाडेर सहज जित हासिल गरेको थियो । चोटमुक्त भएर लामो समयपछि मैदान फर्केका ओपनर समेत रहेका कप्तान सुवास खकुरेल र प्रेम तामाङले पहिलो विकेटका लागि २६ रनको साझेदारी गरे ।

प्रेम र गौरव चित्तकाराले दोस्रो विकेटका लागि ३९ रनको अविजित सझेदारी गर्दै टोलीलाई जित दिलाए । प्रेम १४ र गौरव ३० रनमा अविजित रहे । गौरवले १३ खेलमा ३ छक्का र २ चौका प्रहार गरे । १९ बल खेलेका प्रेमले २ चोका प्रहार गरे । सुवासले १३ बलमा ४ चौकासहित १९ रन जोडेका थिए । रुपन्देहीका लागि १ मात्र विकेट जितेन्द्र मुखियाले लिए ।

त्यसअघि टस जितेर ब्याटिङ रोजेको रुपन्देहीले १५.२ ओभरमा सबै विकेट गुमाएर ६१ रन मात्र बनायो । अत्तरियाका कमल सिंह र शुभंकर उरोवले रुपन्देहीको ब्याटिङ लाइनअप ध्वस्त पारेका थिए । कमलले ४ ओभरमा १५ रन खर्चेर ४ विकेट लिए । शुभंकरले २.२ ओभरमा १ मेडनसहित ७ रन खर्चेर ३विकेट लिए ।

कृष्ण कार्की, विपिन चन्द्रा र दीपेन्द्र सिंह ऐरी समान १ विकेट लिए । रुपन्देहीका लागि सुफैन मेहमुदबाहेक कुनै पनि खेलाडीले दोहोरो अंकमा रन जोड्न सकेनन् । सुफैनले २५ बलमा १ चौका र १ छक्काको मद्दतमा अविजित २० रन जोडेका थिए । अत्तरियाका कमल खेलको म्यान अफ दी म्याच घोषित भए ।