धनगढी (हाम्रो खेलकुद) – राष्ट्रिय टोलीका उप कप्तान ज्ञानेन्द्र मल्लको नेतृत्वमा रहेको काठमाडौं गोल्डेन्सले रुस्लान डिपिएल २ मा विजयी सुरुआत गरेको छ । ओपनर अमित श्रेष्ठको उच्च प्रदर्शनबाट प्रेरित काठमाडौंले उद्घाटन खेलमा शनिबार धनगढी टिम चौराहालाई ७ विकेटले हराउँदै जितबाट यात्राको सुरुआत गरेको हो ।

धनगढी टिम चौराहाविरुद्ध अर्धशतक पुरा गरेपछि काठमाडौं गोल्डेन्सका अमित श्रेष्ठ (दायाँ) । तस्बिर: विवेक सुवेदी /हाम्रो खेलकुद

१ सय ४६ रनको लक्ष्य पछ्याएको काठमाडौंले अमितको अर्धशतकको मद्दतमा ८ बलअघि नै ३ विकेटको क्षेतिमा आवश्यक रन (१४६) जोडेको थियो । ओपनर समेत रहेका अमितले पहिलो विकेटका लागि जयकिशन कोल्सावालसँग ५९ रनको साझेदारी गर्दै उत्कृष्ट सुरुआत दिलाएका थिए । उनले चौथो विकेटका लागि नरेश बुढाएरसँग अविजित ५५ रनको साझेदारी गर्दै टोलीलाई जित दिलाएका हुन् ।

म्यान अफ दी म्याच समेत बनेका अमिले ६५ बलमा ९ चौका र ४ छक्काको मद्दतमा ८१ रन बनाएका थिए । नरेशले १८ बलमा १ चौका र २ छक्काका साथ २४ रन जोडे । बाबुको निधनको खराब पाउनका वावजुद भारतीय जयकिशनले शनिबारको खेल खेलेका थिए । विकेटकिपर समेत रहेका उनले १३ बलमा १ चौका र १ छक्कामा १६ रन जोडे । कप्तान ज्ञानेन्द्रले १० र सन्नी पटेलले ७ रन जोडे । धनगढीका लागि समसुद शिखले २ तथा योगेन्द्र सिंह कार्कीले १ विकेट लिए ।

त्यसअघि टस ब्याटिङको निम्तो पाएको धनगढीले ओपनर सुनिल धमलाको अर्धतशतक निर्धारित २० ओभरमा ६ विकेट गुमाउँदै १ सय ४५ रन बनाएको छ । ओपनर पुनित मिश्रा (९ रन) सस्तैमा आउट भएपछि मैदानमा शंकर रानासँग मिलेर सुनिलले टोलीलाई उकासेका थिए । उनीहरुले दोस्रो विकेटका लागि ७१ रनको साझेदारी गरेका थिए । सुनिलले ६८ र शंकरले ३६ रन बनाए । ५७ बल खेलेका सुनिलले ८ चौका र २ छक्का प्रहार गरे । ३१ बल खलेका शंकले ५ चौका प्रहार गरे ।

१ विकेटको क्षेतिमा १ सय २६ रन बनाएपछि त्यसपछि लगातार विकेट गुमाएपछि धनगढीले सोचे अनुरुपको प्रदर्शन गर्न सकेन । काठमाडौंका सहाब आलमले पहिलो खेलमै ह्याट्रिक पुरा गरेपछि धनगढी भने दबावमा परेको थियो । सहाबले सुनिलसहित सोनु तामाङ र कप्तान सोमपाल कामीको विकेट लिएका थिए । काठमाडौंका लागि किशोर महतो, रसिद खान र सन्नी पटेलले समान १ विकेट लिए ।