भैरहवा (हाम्रो खेलकुद)– लुम्बिनी लायन्स भैरहवामा जारी तेस्रो नेपाल मारवाडी टि ट्वान्टी क्रिकेट प्रतियोगिताको फाइनलमा प्रवेश गरेको छ । सेमिफाइनलमा जनकपुर ब्लास्टर्सलाई बिहीबार ९ विकेटले हराउँदै लुम्बिनी लायन्स अन्तिम दुईमा पुगेको हो ।

सिद्धार्थ रंगशालामा १ सय ३३ रनको लक्ष्य पछएको लुम्बिनी लायन्सले १४.१ ओभरमा मात्र १ विकेट गुमाएर १ सय ३८ रन बनाउँदै नतिजा आफ्नो पक्षमा पार्यो । टोलीका लागि शुभम अग्रवालले अर्धशतक पुरा गरे । शुभमले ९० र सौरभ अग्रवालले ४२ रन बनाए । जनकपुरका राहुल नाहरले १ विकेट लिए ।

त्यसअघि टस हारेर ब्याटिङको निम्तो पाएको जनकपुरले ९ विकेटको क्षतिमा १ सय ३२ रन बनाएको थियो । टोलीका राहुल नाहरले ४५, चन्दन टेकडीवालले २८ तथा कुमाल गोयनकाले १२ रन बनाए । भैरहवाका दामोदर शर्मा, सोेमेश अग्रवाल र शुभमले समान २ विकेट लिए । शुभम अग्रवाल म्यान अफ द म्याच घोषित भए ।

लुम्बिनीले उपाधिका लागि विराटनगरसँग प्रतिस्पर्धा गर्ने छ । नेपाल राष्ट्रिय मारवाडी युवा संगठनको आयोजनामा भइरहेको प्रतियोगिताको फाइनल चैत १८ गते काठमाडौं स्थित कीर्तिपुर मैदानमा हुनेछ । प्रतियोगिताको विजेताले ७५ हजार तथा दोस्रो हुने टोलीले ३५ हजार रुपैयाँ प्राप्त गर्ने मारवाडी युवा मञ्च भैरहवाका अध्यक्ष मनोज अग्रवालले बताए ।