काठमाडौं (हाम्रो खेलकुद) – हालै एक दिवसिय मान्यता प्राप्त गरेको नेपाली राष्ट्रिय क्रिकेट टोलीले इङ्ल्यान्डको लर्ड्स क्रिकेट मैदानमा त्रिकोणात्मक टि ट्वान्टी क्रिकेट श्रृखंला खेल्ने भएको छ ।

मेरिलबोन क्रिकेट क्लब (एमसीसी) ले सोमबार विज्ञप्ती जारी गर्दै नेपाल, नेदरल्यान्ड्स र एमसीसीबीचमा टि ट्वान्टी श्रृखंला आयोजना गर्ने जनाएको छ । जुलाई २९ लर्ड्स क्रिकेट मैदानमा हुने प्रतियोगितामा सहभागी तीन टिमले एक अर्कासँग खेल्नेछ । शीर्ष दुई टोलीले उपाधिका लागि प्रतिस्पर्धा गर्नेछन् । श्रृंखलाको पहिलो खेल बिहान र फाइनल खेल साँझ हुनेछ ।

नेपाली राष्ट्रिय क्रिकेट टोलीका कप्तान पारस खड्काले ‘होम अफ क्रिकेट’ भनेर चिनिने लर्डस्मा एकपटक खेल्न पाउनु नेपाली क्रिकेटका लागि सुखद खबर भएको बताएका छन् । नेपाललाई आमन्त्रण गरेकोमा एमसीसीलाई धन्यवाद दिदै पारसले यो समरमा क्रिकेटले केही फड्को मार्ने विश्वास व्यक्त गरेका छन् ।

एमसिसीका क्रिकेट प्रमुख जोन स्टेफेनसनले नेपाल र नेदरल्यान्ड्सलाई लर्डसमा स्वागत गर्न पाउँदा निकै गौरवान्वित भएको बताएका छन् । नेपालले सन् २०१६ को जुलाई १९ मा लर्ड्समा पहिलो खेल खेलेको थियो । एमसिसीबिरुद्धको खेलमा नेपालले ४१ रनको जित हात पारेको थियो । नेदरल्यान्ड्ले भने २०१२ मा ४० ओभरको प्रतियोगिता खेलेको थियो ।