केप टाउन (एजेन्सी)– बल टेम्परिङ गरेको स्वीकार्दै अष्ट्रेलियन क्रिकेट टोलीका कप्तान स्टिभ स्मिथले पद छोडेका छन् । स्थिमसँगै उपकप्तान डेभिड वार्नर पनि पदबाट अलग भएका छन् । दक्षिण अफ्रिकाविरुद्धको तेस्रो टेस्टको बाँकी रहेको दुई दिनका लागि टिम पेन कप्तान नियुक्त भएका छन् । उनी अष्ट्रेलियन क्रिकेट टोलीको ४६ औं टेस्ट कप्तान बनेका छन् ।

पेनको कप्तानीमा स्थिम र वार्नर खेलाडीका रुपमा भने रहने बताइएको छ । क्रिकेट अष्ट्रेलियाका मुख्य कार्यकारी अधिकृत जेम्स सदरल्यान्डले भने,‘ स्थिम र वार्नरसँगको छलफलपछि उनीहरुले पद छाड्ने सहमती बनेको छ । टेष्ट जारी रहन्छ र यसबीचमा अनुसन्धान पनि जारी रहन्छ ।

दक्षिण अफ्रिकाविरुद्धको तेस्रो टेस्टको तेस्रो दिन शनिबार अष्ट्रेलियाका ओपनर क्यामन बेनक्राफ्टले बल टेम्परिङ गरेका थिए । तेस्रो दिनको खेलपछि कप्तान स्मिथले पनि बल टेम्परिङ गरेको स्वीकार गरेका छन् । घटनापछि अस्ट्रेलियन सरकारले क्रिकेट अष्ट्रेलियालाई स्थिमलाई कप्तानबाट हटाउन भनेको थियो । अष्ट्रेलियाका प्रधानमन्त्री माल्कम टर्नबुलले घटनाले आफु आश्चार्यमा पर्नुका साथै निराश भएको बताएका छन् ।

बेनक्राफ्टले खेलका दौरान ट्राउजरबाट पहेलो रंगको बस्तु निकालेको देखिएको थियो । अम्पायरले त्यसका बारेमा बेनक्राफ्टसँग सोधेका थिए । भिडियोमा उनी बलमा केहि लगाइरहेको देखिएको थियो । त्यसपछि उनले फेरि त्यो पहेलो बस्तु खल्तीमा राखेका थिए । बेनक्राफ्टले पछि त्यो पहेलो बस्तु टेप भएको स्वीकारेका थिए ।

स्थिमले फाइदा हुने अपेक्षाका साथ गरिएको स्वीकारेका छन् । ‘हामीले जे गर्यौं त्यसमा गर्व लागेको छैन,’स्थिमले भने,‘यसमा प्रशिक्षक सहभागी छैनन् । कप्तानका रुपमा अब यस्तो घटना दोहोरिने छैन ।’चौथो दिन आइतबारको खेल जारी रहँदा घरेलु टोली दक्षिण अफ्रिकाले ४ सय भन्दा बढी रनको अग्रता लिइसकेको छ ।