अर्जुन कार्की
बागलुङ – बुटवल युवा स्पोर्टस् क्लब धौलागिरी कप तथा चैत्राष्टमी टि ट्वान्टी क्रिकेट प्रतियोगिताको क्वार्टरफाइनलमा पुगेको छ । धौलागिरी क्रिकेट क्लबलाई ८८ रन हराउँदै बुटवल अन्तिम आठमा पुगेको हो । २ सय २० रनको लक्ष्य पछ्याएको धौलागिरीले २० ओभरमा ८ विकेट गुमाउँदै १ सय ३१ रनमा मात्र बनाउन सक्यो । टोलीका राजु थापाले ३१ र प्रविन ढकालले १७ रन बनाए ।

बुटवलका इन्द्रदेव निशान र याम क्षेत्रीले समान २, अमरदिप सिंह, गोलु यादव, अभिषेक त्रिपाठी र सुवम यादवले समान १ विकेट लिए । त्यसअघि टस जितेर पहिलो ब्याटिङ गरेको बुटवलले १८ ओभरमा सबै विकेट गुमाएर २ सय १९ रन बनाउँदै अलआउट भएको थियो ।

टोलीका लागि सुवम यादवले २३ बलमा ४९ रन र सिकन्दर यादवले ४० रन बनाए । धौलागिरीका रिम थापाले ३, सन्देश छन्त्याल र प्रतिक थापाले समान २ तथा सागर शर्मा, अभिषेक सिंह र तेजेन्द्र घर्तिले समान १ विकेट लिएका थिए । बुटवलका सुवम म्यान अफ दी म्याच घोषित भएका थिए ।

आजै हुने भनिएको बागलुङ नगरपालिका–५ मालिका नखेलि विजयी भएको छ । शिवशक्ति भैरहवा अनुपस्थित भएपछि बागलुङ विजयी भएको थियो । प्रतियोगितामा शुक्रबार लेकसाइट क्रिकेट क्लब पोखरा र नेपाल विद्यार्थी संघ बागलुङ तथा रमक ११ स्याङजा र बुटवल युवा स्पोर्टस् क्लबबीच प्रतिस्पर्धा हुनेछ ।