हरारे (एजेन्सी)– विश्वकप छनोटको सुपर सिक्समा युएईसँग ३ रनले पराजित भएपछि आयोजक जिम्बावे अर्को वर्ष आयोजन हुने विश्व कप क्रिकेटमा पुग्न असफल भएको छ । घरेलु मैदानमा भएको खेलमा डक वर्थ लुइस (डिएल) का आधारमा जिम्बावे ३ रनले पराजित भएको हो ।

वेस्ट इन्डिज सुपर सिक्सको सबै खेल जित्दै शीर्षस्थानमा रहने पक्का भएपछि विश्व कपमा छनोट भइसकेको छ । अब अफगानिस्तान र आयरल्याण्डमध्ये एउटा टोली विश्व कपका लागि छनोट हुनेछ । छनोटका शीर्ष २ टोली विश्व कपमा पुग्नेछन् । युएईले ४७.५ बलसम्म २ सय ३५ रन बनाउँदा वर्षा खेलमा बाधक भएपछि जिम्बावेले ४० ओभरमा २ सय ३० रनको लक्ष्य पाएको थियो ।

१८ रनमा दुवै ओपनर गुमाएको जिम्बावेका लागि सन विलियम्सले ८० बलमा ८० रन बनाएपनि उनको योगदान खेर गएको हो । ४० औं ओभरमा १५ रनको आवश्यकता रहेको जिम्बावेलाई खेलमा ३ विकेट लिएका मोहम्मद नाभिदले ११ रनमात्र दिए । नाभिद खेलको म्यान अफ द म्याच भए ।

टस हारेर ब्याटिङको निम्तो पाएको युईएका लागि रमिज शाहजादले सर्वाधिक ५९ रन बनाए। सुपर सिक्सको अन्तिम खेलमा अफगानिस्तानले आयरल्यान्डको सामना गर्नेछ । त्यसको विजेताले विश्व कपमा स्थान बनाउनेछ । खेलको नतिजा नआएका आयरल्यान्डले दोस्रो स्थानमा सुपर सिक्स समाप्त गर्नेछ ।