काठमाडौं (हाम्रो खेलकुद) – घरेलु क्रिकेटको सर्वाधिक पुरस्कार राशिको धनगढी प्रिमियर लिग (डिपिएल) को दोस्रो संस्करणको खेल तालिका सार्वजनिक भएको छ । डिपिएललाई यस सिजन आइसीसीले समेत मान्यता दिएको छ ।

आयोजक धनगढी क्रिकेट एकेडेमीले प्रेस विज्ञप्ति जारी गर्दै खेल तालिका सार्वजनिक गरेको हो । सार्वजनकि भएको खेल तालिका अनुसार उद्घाटन खेलमा टिम चौराहा धनगढी र काठमाडौं गोल्डेन्सले प्रतिस्पर्धा गर्नेछन् । चौराहा पहिलो संस्करणको विजेता टोली पनि हो । यसपटक चौराहाको कप्तानी सोमपाल कामीले गर्नेछन् भने काठमाडौं गोल्डेन्सको कप्तानी राष्ट्रिय टिमका उपकप्तान ज्ञानेन्द्र मल्लले गर्नेछन् । प्रतियोगिताको पहिलो दिन एक खेल मात्र हुनेछ । दोस्रो दिनबाट भने हरेक दिन दुई खेल हुने आयोजकले जनाएको छ ।

डिपिएल–२ को टिम, मार्की खेलाडी र खेलाडीहरुको अक्सन भइसकेको छ । विदेशी खेलाडीको लागि भने टिमहरुले अन्तिम प्रयास गरिरहेका छन् । डिपिएल–२ मा दुई विदेशी खेलाडी अनिवार्य गरिएको छ । धनगढीबाट ट्यालेन्ट हन्टबाट छानिएका एक खेलाडीलाई टिममा अनिवार्य राख्नु पर्ने प्रावधान पनि राखिएको छ ।

चैत १७ गतेबाट शुरु हुने प्रतियोगिता चैत ३० गतेसम्म चल्नेछ । लिगमा देशभरका विभिन्न ६ फ्रेन्चाइज टोलीले सहभागिता जनाएका छन् । लिगको विजेताले २५ लाख रुपैया प्राप्त गर्नेछ । त्यस्तै उपविजेताले १० लाख, तेस्रोले ३ लाख र चौथोले २ लाख नगद प्राप्त गर्नेछन् । प्रत्येक खेलका म्यान अफ द म्याच हुने खेलाडीले १० हजार र म्यान अफ द सिरिज हुनेले टिभीएस अपाचे १८० सीसीको मोटरसाइकल पाउनेछन् । त्यस्तै, उत्कृष्ट ब्याट्सम्यान र बलरले पनि पुरस्कार पाउने छन् ।

टि–२० को आधारमा हुने प्रतियोगिताको लिग चरणमा प्रत्येक टिमले अन्य टिमसँग १–१ खेल खेल्ने छन् । शीर्ष चारमा पर्ने टिम प्लेअफमा पुग्नेछन् । त्यसमा पहिलो र दोस्रो हुने टिम बीचको खेलबाट विजेता टिम फाइनलमा पुग्ने छ । पराजित हुने टिम तेस्रो र चौथो हुने टिमको विजेतासँग फाइनल प्रवेशका लागि खेल्नेछ ।

खेल तालिका

१. १७ चैत १ बजे – टिम चौराहा धनगढीविरुद्ध काठमाडौं गोल्डेन्स्

२. १८ चैत ९ बजे – रुपन्देही च्यालेन्जर्सविरुद्ध सिवाइसी अत्तरिया
३. १८ चैत १ बजे – महेन्द्रनगर युनाइटेडविरुद्ध विराटनगर किङ्स

४. १९ चैत ९ बजे – टिम चौराहा धनगढीविरुद्ध सिवाइसी अत्तरिया
५. १९ चैत १ बजे – रुपन्देही च्यालेन्जर्सविरुद्ध काठमाडौं गोल्डेन्स्

६. २० चैत ९ बजे – महेन्द्रनगर युनाइटेडविरुद्ध टिम चौराहा धनगढी

७. २१ चैत १ बजे – टिम चौराहा धनगढीविरुद्ध विराटनगर किङ्स
८. २१ चैत ९ बजे – सिवाइसी अत्तरियाविरुद्ध काठमाडौं गोल्डेन्स्

९. २२ चैत १ बजे – टिम चौराहा धनगढीविरुद्ध विराटनगर किङ्स
१०. २२ चैत ९ बजे – रुपन्देही च्यालेन्जर्सविरुद्ध महेन्द्रनगर युनाइटेड

११. २३ चैत १ बजे – विराटनगर किङ्सविरुद्ध काठमाडौं गोल्डेन्स्

१२. २४ चैत ९ बजे – महेन्द्रनगर युनाइटेडविरुद्ध सिवाइसी अत्तरिया
१३. २४ चैत १ बजे – टिम चौराहा धनगढीविरुद्ध रुपन्देही च्यालेन्जर्स

१४. २५ चैत ९ बजे – काठमाडौं गोल्डेन्स्विरुद्ध महेन्द्रनगर युनाइटेड
१५. २५ चैत १ बजे – सिवाइसी अत्तरियाविरुद्ध विराटनगर किङ्स

२६ चैत रिजर्भ डे

१६. २७ चैत ९ बजे – क्वालिफायर–१ (लिग वानविरुद्ध लिग २ विजेता)
१७. २७ चैत १ बजे – इलिमिनेटर (लिगको तेस्रो विरुद्ध लिगको चौथो)

१८. २८ चैत १२.३० बजे – क्वालिफायर–२ (क्वालिफायरको लुजरविरुद्ध इलिमिनेटरको विजेता)

२९ चैत रिजर्भ डे

१९. ३० चैत १२.३० बजे – क्वालिफायर्स–१ विजेताविरुद्ध क्वालिफायर्स विजेता–२