कोलम्बो (एजेन्सी)– दीनेश कार्तिकले अन्तिम बलमा छक्का प्रहार गरेपछि बंगलादेशलाई ४ विकेटले हराउँदै भारतले टि ट्वान्टी त्रिकोणात्मक श्रृखंला जितेको छ । अन्तिम बलमा जितका लागि ५ रनको आवश्यता रहेको अवस्थामा कार्तिकले छक्का प्रहार गर्दै टोलीको जित पक्का परेका थिए ।

भारतलाई जितका लागि अन्तिम १३ बलमा ३४ रनको आवश्यकता थियो । १ सय ६७ रनको लक्ष्य पछ्याएको भारतले २० ओभरमा ६ विकेटको क्षतिमा १ सय ६८ रन जोडेको थियो । सातौं नम्बरमा ब्याटिङ गरेका दिनेशले मात्र ८ बलमा २ चौका र ३ छक्काको मद्दतमा अविजित २९ रन बनाएका थिए ।

कप्तान रोहित शर्माले अर्धशतक बनाउँदै टोलीलाई उकासेका थिए । रोहितले ४२ बलमा ४ चौका र ३ छक्काको मद्दतमा ५६ रन बनाएका थिए । शिखर धवनले १० रन जोडे भने सुरेश रैनाले खाता खोल्न सकेनन् । लोकेश राहुलले २४, मनीष पाण्डेले २८ र विजय शंकरले १७ रन जोडे । बंगलादेशका रुवेल हुसेनले २ विकेट लिएका थिए ।

त्यसअघि टस हारेर पहिले ब्याटिङको लागि निम्ताइएको बंगलादेशले सब्बिर रहमानको अर्धशतकको मद्दतमा ८ विकेटको क्षतिमा १ सय ६६ रन बनाएको थियो । ओपनर तमिम इक्वाल (१५) र लिटोन दास(११) मा आउट भएपछि रहमानले इनिङ सम्हालेका थिए ।

५० बल खेलेका रहमानले ७ चौका र ४ छक्का साथ ७७ रन बनाएका थिए । रनआउट भएका महमुदुल्लो २१ रन जोडे । मेहेदी हसन मिराज अविजित १९ रन बनाए । भारतका लागि युजभेन्द्र चाहालले ३ विकेटले लिए ।