अर्जुन कार्की

बागलुङ – बागलुङ बजारमा आजदेखि सुरु भएको पाँचौं धौलागिरी कप तथा चैत्राष्टमी टि–२० क्रिकेट प्रतियोगितामा लेकसाइड क्रिकेट क्लब पोखराले विजयी सुरुवात गरेको छ ।

आइतबार भएको उद्घाटन खेलमा आयोजक टिम बागलुङ क्रिकेट क्लब (रातो) लाई ३७ रनको फराकिलो अन्तरले पराजित गर्दै लेकसाइडले विजयी सुरुवात गरेको हो । टस जितेर पहिले ब्याटिङ रोजेको लेकसाइड १९ ओभरमा १ सय ३९ रनमा अलआउट भएको थियो । खराब सुरुवात गरेको लेकसाइडका लागि तेस्रो क्रममा ब्याटिङ गर्न आएका अर्जुन अधिकारीले ३९ बलमा ५ चौकाको मद्दतले ३८ रन, पाँचौं नम्बरमा आएका राजु तामाङले १४ बलमा २७ रन र पर्वत भुषालले १५ बलमा २८ रनको आक्रामक इनिङ खेलेका थिए ।

बागलुङ क्रिकेट क्लबका लागि शिव खड्काले ४ ओभरमा २३ रन खर्चेर ३ विकेट लिएका थिए भने सन्देश खड्का र रविन आचार्यले समान २–२ विकेट लिए । पोखराका दुई जना ब्याट्सम्यान रनआउट भएका थिए ।

१ सय ४० रनको लक्ष्य पछ्याएर जवाफी ब्याटिङमा उत्रेको बागलुङ क्रिकेट क्लब १६ ओभरमा १ सय २ रनमा अलआउट भएको थियो ।बागलुङका लागि ओपनर शिव खड्काले ३२ बलमा ५ चौकाको मद्दतले ३४ रन र सन्देश खड्काले १६ बलमा २ चौका र २ छक्काको मद्दतले २५ रन बनाए पनि अरु खेलाडीहरुले राम्रो ब्याटिङ गर्न नसक्दा बागलुङले हार बेहोर्न पुग्यो ।

लेकसाइडका लागि अवित ओस्टाले ३ ओभरमा २३ रन खर्चेर ३ विकेट लिएका थिए भने राजु तामाङ र विजयी कुवरले समान २–२ विकेट लिए । त्यस्तै प्रेम गुरुङ र अमृत थापाले पनि १–१ विकेट लिएका थिए । लेकसाइडका १ जना खेलाडी रनआउट भएका थिए ।

प्रतियोगिता अन्तर्गत भोली सोमबारको पहिलो खेल गल्कोट विरुद्ध बागलुङ नगरपालिका–५ मालिक बीच र दोस्रो खेल एनएसयु बागलुङ विरुद्ध कुश्मा क्रिकेट क्लब बीच हुने बागलुङ क्रिकेट क्लबका अध्यक्ष सन्दिप पन्तले जानकारी दिए । बागलुङ क्रिकेट क्लब, फ्युचर स्पोर्टस् क्लब र चैत्राष्टमी मेला २०७४ व्यवस्थापन समितिको संयुक्त आयोजनामा चैत ११ गतेसम्म संचालित प्रतियोगितामा १८ टिमको सहभागिता रहेको छ ।

प्रतियोगिताको विजेताले १ लाख ११ हजार १ सय ११ रुपैयाँ प्राप्त गर्नेछ भने उपविजेताले ५५ हजार ५ सय ५५ रुपैयाँ प्राप्त गर्ने आयोजकले जनाएको छ । यस्तै म्यान अफ दि सिरिजले १० हजार, बेस्ट ब्याट्सम्यान र बेस्ट बलरले जनही ५–५ हजार प्राप्त गर्नेछन् । प्रतियोगितामा ६ लाख ९ हजार ६ सय ६८ रुपैयाँ खर्च लाग्ने आयोजकले बताएको छ । प्रतियोगिताको उद्घाटन बागलुङ नगरपालिकाका मेयर जनकराज पौडेलले गरेका थिए ।