काठमाडौं (हाम्रो खेलकुद) – रुस्लान धनगढी प्रिमियर लिग (डिपिएल) को दोस्रो संस्करण सुरु हुन झन्डै दुई साता बाँकी छ । धनगढीमा हुने डिपिएलको अहिले राजधानीमा चर्चा छ । भृकुटीमण्डपमाशुक्रबार सुरु भएको मेड इन नेपाल एक्स्पो–२०७४ डिपिएल २ को स्टलका कारण चर्चामा रहेको हो । एक्स्पोमा १ सय ४० स्टल छन् । अन्य स्टलमा भन्दा डिपिएल–२ को स्टलमा दर्शकहरुको घुइचो देखिएको छ ।

डिपिएल–२ सुरु हुने केहि दिनअघि स्टल राख्दा प्रतियोगिताको प्रचारमा थप सहयोग पुगेको डिपिएलको आयोजन धनगढी क्रिकेट एकेडेमीका निर्देशक प्रकाश खड्काले हाम्रो खेलकुदलाई बताए । ‘डिपिएल–२ को यसअघि पनि विभिन्न मिडियाहरुबाट व्यापाक प्रचार प्रसार भएको छ । मेड इन नेपाल एक्स्पोमा ‘डिपिएल’ लाई अझै ब्राण्ड बनाउन हामीले स्टल राखेका हौं ’ डिपिएल–२ का निर्देशक समेत रहेका खड्काले भने, ‘डिपिएलको थप प्रचारका लागि स्टल राखेका हौं । भर्खरै मात्र नेपालले एक दिवसीय अन्तर्राष्ट्रिय मान्यता पाएको कारण पनि स्टलमा बढी भीड र माहोल देखिएको हो ।’

डिपिएल–२ को स्टलमा स्पोन्सरहरुबाट ६ वटा रमाइलो खेलहरु पनि राखिएको छ । ब्याटिङ गर्दा ब्याटिङ गर्ने पक्षले ६ स्थानमध्ये जुन स्थानमा हिट गर्न सक्यो , त्यही स्पोन्सरको आकर्षक गिफ्ट ह्याम्पर प्रदान गरिएको स्टलका लक्ष्मण बहादुर सिंहले बताए । स्पोन्सरहरु जगशक्तिबाट मुभी टिकेट, गोल्डस्टारबाट एक थान गोल्डस्टार जुत्ता, नेपाल मेडिसिटीबाट एक थान टिसर्ट, रुस्लानबाट पेन ड्राइभ, डिपिएलले फाइनल टिकट र ई–सेवाले रिचार्जको व्यवस्था गरिएको दर्शकहरुले हिट गर्दै उपहारहरु जितेर थप मनोरन्जन लिइरहेको सिंहले बताए ।

एक्स्पोको अन्तिम दिनसम्म १ हजार भन्दा बढी दर्शकले स्टल अवलोकन गर्ने उनले थपे । युवा उद्यमी मञ्चका अध्यक्ष दीपक थापाले प्रोडक्ट, ब्राण्ड र सर्भिसका लागि मेड इन नेपाल एक्स्पो आयोजना गरिएको बताए । एक्स्पोको अवधि छोटो भएपनि तीन दिनको बीचमा नेपाली ब्राण्डले आफ्नो क्षेत्राधिकार बढाउने मौका पाएको अध्यक्ष थापाले थपे ।

स्टलमा नेपालमै बनेको दक्षिण एसियाको पहिलो तयारी रारा चाउचाउ, नेविको विस्कुट, कृष्ण पाउरोटी, वाइवाई चाउचाउ, हात्ती छाप र गोल्डस्टारलगायतको स्टल छ । एक्स्पो शनिबारसम्म चल्नेछ । सर्वाधिक पुरस्कार राशीको डिपिएलको विजेताले २५ लाख रुपैयाँ पाउनेछ । डिपिएल चैत १७ गतेदेखि सुरु हुने बताइएको छ ।