काठमाडौं (हाम्रो खेलकुद) – जारी आइसीसी विश्वकप छनोट प्रतियोगिता २०१८ अन्तर्गत आज नेपालले सातौं स्थानको प्ले-अफमा नेदरल्यान्ड्सविरुद्ध खेल्दै छ । नेदरल्यान्ड्सले टस जितेर पहिले ब्याटिङ रोजेको छ । नेपाली समयअनुसार सो खेल १.१५ बजे सुरु हुने छ ।

तस्बिर: रमण सिवाकोटी

समूह ‘ए’ मा नेदरल्यान्ड्स एक जित दर्ता गर्दै चौथो स्थानमा रहेको थियो । त्यस्तै नेपालले पनि समूह ‘बि’ मा एक जित दर्ता गर्दै चौथो स्थानमा रह्यो । नेपालले अघिल्लो खेलमा पपुवा न्यु गिनीलाई पराजित गर्न सफल रह्यो । अर्को तर्फ, नेदरल्यान्ड्सले हङकङलाई हराएको थियो । नेदरल्यान्ड्सको सो जितले नेपालको एक दिवसीय अन्तर्राष्ट्रिय मान्यता पनि सुनिश्चित भएको थियो ।

आजको खेलमा दुवै टोलीलाई केहि गुमाउनु छैन । नेदरल्यान्ड्सले विश्व क्रिकेट लिगमार्फत नै एक दिवसीय मान्यता पाइसकेको थियो । यस अघि नेपाल नेदरल्यान्ड्ससँग चार पटक भिड्दा दुईमा जित र दुईमा हार बेहोरेको छ । नेपाल सन् २०१४ मा विश्वकप छनोट प्रतियोगितामा नेदरल्यान्ड्ससँग पराजित भएको थियो । त्यस्तै डिभिजन-२ मा भने नेपालले जित दर्ता गर्न सफल भएको थियो । विश्व किकेट लिगमा नेपालले एक खेलमा जित हांसिल गरेको थियो भने एक खेलमा पराजय भोगेको थियो ।

नेपालको ओपनिङले ज्यादै आलोचना खेपिरहेको बेला आज सो पक्ष्यमा सुधारिएको प्रदर्शन गर्ने मौका हुने छ । आज वसन्त रेग्मीलाई विश्राम दिइएको छ भने उनको स्थानमा अर्का सिनियर स्पिनर शक्ति गौचन टोलीमा समावेश भएका छन् । पिएनजी विरुद्ध खेलेको नेपाली टोलीमा अन्य परिवर्तन छैन ।