कोलम्बो (एजेन्सी)– भारत श्रीलंकामा जारी टि ट्वान्टी त्रिकोणात्मक श्रृखंलाको फाइनलमा पुगेको छ । बंगलादेशलाई बुधबार १७ रनले हराउँदै भारतले फाइनलमा स्थान सुरक्षित गरेको हो । भारतले आइतबार हुने फाइनल श्रीलंका र बंगलादेशमध्ये एकको सामना गर्नेछ । श्रीलंका र बंगलादेशबीच हुने अन्तिम खेलबाट फाइनल पुग्ने दोस्रो टोलीको टुंगो लाग्नेछ ।

१ सय ७७ रनको लक्ष्य पछ्याएको बंगलादेश ६ विकेटको १ सय ५९ रन बनाएको थियो । बंगलादेशका लागि मुस्फिकर रहिमले अविजित ७२ रन बनाएपछि टोलीले हार जोगाउन सकेन । तमिम इक्वाल र सब्बिर रहमानले समान २७ रन तथा मोहम्मदुल्लाले ११ रन बनाए । भारतका बाशिंटन सुन्दरले ४ ओभरमा ३ विकेट लिएपछि बंगलादेश लक्ष्यमा पुग्न सकेन । मोहम्मद सिराज, शार्दुल ठाकुर र युजभेन्द्र चाहालले समान १ विकेट लिए ।

त्यसअघि टस हारेर ब्याटिङ गरेको भारतले निर्धारित २० ओभरमा ३ विकेट गुमाएर १ सय ७६ रन बनाएको थियो । जसमा कप्तान रोहित शर्माको भूमिका महत्वपूर्ण रह्यो । ६१ बल खेलेका रोहितले टोलीका लागि सर्वाधिक ८९ रन जोडेका थिए । प्लेयर अफ दी म्याच रोहितले ५ छक्का र त्यत्ति नै चौका प्रहार गरेका थिए । उनले शिखर धवनसँग पहिलो विकेटका लागि ७० रनको साझेदारी गरेका थिए । धवनले २७ बलमा ५ चौका र १ छक्कासहित ३५ रन जोडे ।

सुरेश रैनले ३० बलमा ४७ रन जोडे । ५ चौका र ३ छक्का प्रहार गरेका सुरेशले रोहितसँग दोस्रो विकेटका लागि १ सय २ रनको साझेदारी गरेका थिए । दिनेश कार्तिक २ रनमा अविजित रहे । बंगलादेशका लागि रुबेल हुसेनले २ विकेट लिए । बंगलादेश र श्रीलंकाबीच शुक्रबार लिगको अन्तिम खेल हुनेछ ।